Ný stikla úr Jóhanna – Síðasta orrustan

Ný stikla er komin út fyrir heimildarmyndina Jóhanna – Síðasta orrustan, en myndin verður frumsýnd þann 15. október.

Í myndinni er fylgst með störfum Jóhönnu Sigurðardóttur fyrrum forsætisráðherra og því sem gerist bak við tjöldin í Stjórnarráðinu. Kastljósinu er einkum beint að baráttu hennar og annarra fyrir því að fá Alþingi til að samþykkja nýja stjórnarskrá Íslands.

Sjáðu stikluna hér fyrir neðan:

Myndin hefst á landsfundi Samfylkingarinnar þegar Árni Páll Árnason tekur við af Jóhönnu sem formaður flokksins.

Árn Páll boðar ný vinnubrögð og lætur af þeirri stefnu Jóhönnu að reyna að knýja stjórnarskrána í gegnum þingið og vill þess í stað skapa þverpólitíska samstöðu um að fresta hluta hennar til næsta kjörtímabils.

Þessi stefna veldur miklum ágreiningi við þá sem vilja klára málið, jafnt innan Samfylkingarinnar og utan. Í kjölfarið verða mikil átök á þingi og í bakherbergjum um stjórnarskrármálið – og engin leið að vita hvaða endi það muni fá.

Í tilkynningu frá Bíó paradís, þar sem myndin verður sýnd, segir að þetta sé í fyrsta skipti sem heimildarmynd af þessari tegund sé gerð hér á landi, þegar fylgst er með stjónmálamanni í valdastöðu og öllum þeim vendingum sem verða í meðferð þingsins á mikilvægu máli – eins og stjórnarskrá Íslands.

Leikstjóri myndarinnar er Björn B. Björnsson og er hann jafnframt handritshöfundur ásamt Elísabetu Ronaldsdóttur, sem klippir myndina. Kvikmyndatöku annaðist Jón Karl Helgason og tónlistin í myndinni er eftir Tryggva M. Baldvinsson. Framleiðandi er Reykjavík films.

Hér fyrir neðan er plakat myndarinnar:

jóhanna