Payback (1999)

Kvikmyndin Payback reyndist stórgóð endurgerð af snilldarverkinu Point Blank frá árinu 1967, sem þó verður að teljast betri enda fjögurra stjörnu mynd. Mel Gibson er jafn sannfærandi og Lee Marvin í hlutverki glæpamannsins, er snýr aftur til að leita hefnda og innheimta hlut sinn af ránsfengnum, sem eiginkona hans og samstarfsmaður höfðu af honum, þegar þau reyndu að drepa hann eftir vel heppnað rán. Ég mæli eindregið með báðum myndunum en þó aðeins á breiðtjaldi. Point Blank er sýnd reglulega í réttum hlutföllum á sjónvarpsstöðinni TNT.

Frumleg glæpamynd þar sem Mel Gibson sýnir á sér nýja hlið. Atburðarásin gengur út á það að maður nokkur að nafni Porter, sem Mel Gibson leikur, er svikinn um 70 þúsund dollara eftir að hafa framið rán með félaga sínum og er þar að auki skotinn nokkrum sinnum og skilinn eftir til að deyja. Hann bjargast þó og eftir nokkra mánuði þegar meiðslin hafa jafnað sig snýr Porter aftur til þess að fá peningana sína og hefna sín í leiðinni. Eins og ég sagði áður þá er hlutverk Gibsons alls ekki dæmigert fyrir hann, hingað til höfum við langoftast séð hann sem góðu hetjuna en hérna er hann aftur á móti frekar óviðkunnanlegur náungi þó hann sé enga að síður aðalpersóna myndarinnar. Myndin blandar saman húmor, ofbeldi og spennu á frumlegan hátt og ég mér fannst útkoman vera mjög góð skemmtun.