Fólkið í blokkinni (2013)

Vigga er 11 ára stelpa sem býr með fjölskyldu sinni í blokk á höfuðborgarsvæðinu. Óli bróðir hennar er hrakfallabálkur sem safnar gæludýrum, allt frá ánamöðkum að útigangsmönnum, og er þetta áhugamál hans að gera mömmu hans, Sjólu, gráhærða. Sara systir þeirra Viggu og Óla er efni í rammgöldrótta norn. Pabbinn Tryggvi reynir eins og hann getur að forða heimilisfólkinu frá vandræðum og umfram allt, að halda friðinn. Hitt fólkið í blokkinni er af öllum toga og hvert öðru litríkara. Hundfúll húsvörður, frönsk hefðarfrú, símadama með félagsfælni, þunglyndur leikari, sjálfshjálpargúrú sem er kannski engill, flóttamaður frá Rúanda og margir fleiri. Allar þessar ólíku manneskjur spila þátt í að gera líf Viggu og fjölskyldu hennar skrýtið, fjölbreytt og skemmtilegt. Sögurnar sem Vigga segir okkur eru sprenghlægilegar en þó um leið raunsannar, kryddaðar óbeisluðu ímyndunarafli og hreinskilni.