Skoppa og Skrítla 6-10 (2012)

Hér er komin glæný þáttröð frá Skoppu og Skrítlu og um leið sjálfstætt framhald þáttanna sem sýndir voru í sjónvarpi árið 2008. Skoppu og Skrítlu þarf ekki að kynna. Þær stöllur hafa gert sjónvarpsþætti, kvikmynd, DVD-diska, geisladiska og bækur með efni sem er í öllum tilfellum sniðið fyrir yngstu börnin sem eru að uppgötva lífið og skynja tilveruna í fyrsta sinn. Áherslan er lögð á jákvæðan og uppbyggilegan boðskap. Í þeim fimm 12 mínútna þáttum sem eru á þessum diski er þemað spunnið í kringum spurninguna „hvað viltu verða þegar þú ert orðin(n) stór?“. Í hverjum þætti kynnast þær Skoppa og Skrítla einu barni sem þær síðan fylgja til að fá að sjá hvernig barnið nálgast ósk sína. Ferðast er innanlands sem utan og sérlegir vinir þeirra Skoppu og Skrítlu, Lúsí, Bakari Svakari og Zummí, eru ekki langt undan. Börnin í þáttunum eru á aldrinum tveggja til átta ára og óskirnar eru bæði margvíslegar og metnaðarfullar.