Insomnia (2002)

Ég verð að segja að Insomnia kom mér verulega á óvart. Þegar ég fór á hana í bíó bjóst ég við leiðinlegri dramatískri mynd,

en hún átti sko eftir að sanna annað. Þekktur lögreglumaður (Al Pacino) frá Los Angeles er sendur til krummaskuðs í Alaska til að rannsaka morðmál á ungri stúlku. Honum til halds og trausts er samstarfsfélagi hans frá LA og ung lögrglukona sem leikinn er af Hillary Swank. Málin eiga síðan eftir að flækjast allverulega og er þetta síðan orðinn æsispennandui eltingar- leikur við morðingjann. Einnig má þess geta að leikarinn góðkunni Robin Williams leikur eitt af aðalhlutverkunum.

Semsagt gulltryggð skemmtun fyrir alla kvikmyndaunnendur.

Góð mynd. Virkilega góð. Fer sínar eigin leiðir. Góðir leikarar og allir standa sig vel. Robin Williams er perla í sínu og Pacino er svo þreyttur í myndinni að ég varð syfjaður með honum þó myndin væri spennandi. A must see.

Insomnia er endurgerð á norskri mynd með Stellan Skarsgård í aðalhlutverkinu. Hér er aðalpersónan leikin af Al Pacino. Ég hef ekki séð frummyndina en sem bandarísk endurgerð af erlendri mynd er Insomnia sennilega sú besta sem ég hef séð þeirrar tegundar.

Myndin fjallar um lögreglumanninn Will Dormer (Al Pacino) sem er sendur til lítils byggðarlags í Alaska ásamt félaga sínum (Martin Donovan) til þess að rannsaka hrottalegt morð á ungri stúlku. Þar tekur á móti þeim nýliðinn Ellie Burr (Hilary Swank) en Dormer hefur verið átrúnaðargoð hennar síðan hún ákvað að gerast lögga.

Lögreglan í Alaska bað um aðstoð vegna þess að þetta morð er óvenjulegt í alla staði fyrir þennan stað. Það hefur verið framið af mikilli nákvæmni og vandvirkni, morðinginn hefur búið vel um það og hefur verið hinn rólegasti allan tímann. Þeir eiga greinilega í höggi við brjálæðing.

VARÚÐ, VARÚÐ!!!!!! Uppljóstranir framundan!!!!!!!!!


Margt þjakar Dormer. Innra eftirlitið er að rannsaka hann vegna máls sem hann vann að áður en hann var sendur í þetta. Stöðug miðnætursólin lengst úti á norðurhjara verður til þess að hann getur ekki sofið og fer að missa einbeitinguna. Og þegar lögregluliðinu tekst að króa morðingjann af gerir Dormer mistök sem plaga hann upp frá því. Og það sem verra er, morðinginn sá það. Svo hann fer að hringja í Dormer, leikur sér við hann til þess að lokka hann alltaf nær sér. Leikur kattarins að músinni er byrjaður en spurningin er, hver er kötturinn og hver er músin.

Það að Christopher Nolan geri jafn góða mynd eftir snilldina Memento er ósanngjörn krafa. Enda er þessi mynd ekki alveg eins góð. En þegar kemur að sálfræðilegum spennumyndum er hún með þeim betri sem ég hef séð í langan tíma. Handrit Hillary Seitz eftir upphaflegri sögu Nikolaj Frobenius og Erik Skjoldbjærg er vel úthugsað og uppfullt af óvæntum fléttum og einstaklega góð leikstjórn Nolans í bland við frábæran leik stjarnanna gerir þetta að hörkuspennumynd. Einnig spilar frábær klipping Dody Dorn þar inn í en hann eykur á ofsóknarkennt og óhugnanlegt andrúmsloftið með snöggum innskotum sem eiga að tákna einbeitingu Dormers og niðurbrot hennar.

Mér finnst sérstaklega sniðugt að láta þetta gerast í Alaska. Stórfenglegt og kuldalegt landslagið spilar afar vel inn í einmanalegt líferni löggunnar og þessi stöðuga birta sem ríkir þarna eykur á ofsóknartilfinninguna sem er óvenjulegt af því að venjulega er þessu öfugt farið með nótt.

Leikaravalið gæti í rauninni varla verið betra. Al Pacino, sá magnaði snilldarleikari, hefur ekki verið jafn góður síðan í Donnie Brasco árið 1997 og túlkar hreint frábærlega hina þjökuðu löggu, bæði af svefnleysi og ekki síður af sálarkvölum. Þetta er heldur ekki þessi venjulega hetjulögga sem við eigum að venjast í venjulegum spennumyndum. Hann er frekar veikgeðja maður sem er langt í frá að vera eitthvað sérstaklega fullkominn eða heiðarlegur. Og enginn getur leikið þreytu jafnvel og Pacino, maður varð nánast þreyttur sjálfur. Robin Williams myndar síðan fínt mótjafnvægi við hann. Það er i rauninni sjokkerandi að sjá góðlátlega gamanleikarann Williams umturnast í þennan sálsjúka brjálæðing og hrotta, fullan af illsku. Frábærlega vel leikið hjá honum einnig. Hilary Swank skilar síðan vel sínu en er heldur vannýtt.

Allt í allt er Insomnia vel gerð, frábærlega vel leikin og óvenjulega djúpur og spennandi sálfræðitryllir sem hittir oftast beint í mark.

P.s. Ég gaf henni þrjár stjörnur til að aðskilja hana örlítið frá Memento en þetta er í rauninni ósanngjarn dómur. Ég myndi allavega segja þrjár og 2 plúsar að auki.

Insomnia er ágætis afrek fyrir Christopher Nolan, þó svo að hún komist hvergi með tærnar þar sem Memento hafði hælanna í frumleika og stíl. Það er að vísu ósanngjarnt að bera myndirnar tvær saman, en þar sem að Memento er ein af betri myndum sem ég hef á ævi minni séð kemst ég ekki hjá því. Insomnia er engu að síður frábær dramaþriller þar sem ekkert er 100% samkvæmt formúlunni. Ég skal játa mig sekan fyrir að hafa ekki séð upprunalegu norsku myndina, þannig að ég get ómögulega borið hana saman við þessa mynd. Hún gæti rétt eins verið nákvæmlega eins, en það breytir því ekki að ég sat pikkfastur við amerísku útgáfuna frá upphafi til enda og dáðist að henni allan tímann.Í fyrstu spilast þetta út eins og hefðbundin morðsaga en síðan fer myndin langt út fyrir línurnar. Söguþráðurinn gengur ekki út á það að reynt er að komast að því hver morðinginn er (við vitum það strax), heldur gengur hann út á samskipti morðingjans við veiklyndu lögguna, sem eiga meira sameiginlegt en áhorfandinn heldur, og þetta hrindir af stað kaldri, margbrotinni og að mínu mati afar ófyrirsjáanlegri atburðarás. Það er líka töff indie-stíll á myndinni sjálfri sem minnir svolítið á Memento, sömuleiðis með allt hvað varðar tæknivinnslu og tónlist. Og ef út í það er
farið þá er margt hér sem á mikið sameiginlegt við þá mynd; þær segja t.d. báðar sögur frá sjónarhorni gallaðrar aðalpersónu, sem þjáist bæði af alvarlegum veikleika og er eltur andlega af fortíð sinni. Atburðarásin er jafn óljós hér og í þeirri mynd og passlegt magn af plott-twistum er til staðar. Það er samt ekkert erfitt að finna mismun þessara mynda og allt svoleiðis, en það er allavega gífurlega sniðugt hvernig Nolan vinnur úr efnunum sem hann fær. Honum tekst svo vel að útfæra óþægilegt andrúmsloft og hann leyfir áhorfendum að finna fyrir þjáningu aðalpersónunnar (Will Dormer - leikinn af Serpico sjálfum, Al Pacino), og sýnt er á trúverðugan hátt hvernig honum líður eftir að gengið dögum saman án svefns. Það er heldur ekki erfitt fyrir áhorfandann að tengja sig við þessar þjáningar.Leikur er almennt frábær, enda er ekki hægt að búast við öðru þegar þrír Óskarsverðlaunahafar hertaka aðalhlutverkin. Al Pacino og Robin Williams eru samt gríðarlega traustir saman, og koma í veg fyrir að maður missi nokkurn tímann áhuga á sögunni með frábærum samleik og brilliant samræðum. Hilary Swank hefði samt mátt fá meira að gera. Hún stendur sig vel en persóna hennar er mestmegnis voða gagnslaus og fer ekki að gera neitt af alvöru viti fyrr en alveg í lokin. En burtséð frá fáeinum göllum verður því ekki neitað að Nolan hafi hér fært okkur mynd sem óhætt er að mæla sterklega með. Hlakka til að sjá hvað hann gerir næst.8/10

Þessi mynd er eiginlega svipuð og nafnið gefur til kinna. Hún fjallar um lögreglumann (Al Pacino) sem fer að ransaka morð og út af því að það er bjart allann sólahringinn á þessum stað (svipað og hér á sumrin) þá getur hann ekki sofið og verður á endanum á milli svefns og voku. Um leið er myndin svolítið í þeim stíl, pínu langdregin, og þung.

Það hentar samt ekki alltaf að troða svona mörgum gæðaleikurum inn í eina mynd (gekk samt vonum framar í Magnolia). En hún hélt manni samt skemtilega á bláþræði og eftir myndina var maður aðeins þunglindari en þegar maður gekk inn í bíóið.

Ágætis mynd með góðri flækju sem ég er ekki alveg búinn að leisa enn. Þið sem eruð aðeins klárari en ég ættuð samt að geta það eftir að sjá hana einu sinni, eða hvað?

Insomnia er vel heppnaður spennutryllir úr smiðju Christopher Nolans, leikstjóra Memento. Al Pacino fer með hlutverk goðsagnarkennds rannsóknarlögreglumanns sem er sendur til smábæjar í Alaska þar sem sólin sest aldrei yfir sumarið. Þar á hann að reyna að leysa úr óvenjulegu morðmáli en örlögin haga því þannig að fljótt verður meira í húfi en framgangur réttlætisins. Robin Williams er öflugur í hlutverki ómennis og morðingja og er þetta væntanlega í fyrsta skipti sem hann leikur slíkan karakter. Leikstjórnin hérna er gífurlega hæf og með þessum leikhóp er erfitt að klikka. Myndin er líka yfir heildina vel skrifuð og trúverðug, engin langsótt flétta hér í síðasta leikþættinum. Hrós verður líka að veita fyrir stíl myndarinnar, sem er á köflum áhrifaríkur og lýsir vel hvernig líðan hjá manneskju sem hefur ekki sofið í marga daga er. Insomnia er ekki eins góð mynd og Memento, þar sem sú síðarnefnda byggði á ótrúlega frumlegri frásagnaraðferð sem smellpassaði sögunni. Insomnia er meira ''straight-forward'' (no pun intended) en gerir engu að síður öllu góð skil. Semsagt, traustur spennutryllir sem ætti að halda athygli vel flestra út í gegn.

Insomnia er mjög óvenjuleg mynd, hún fjallar um lögreglumann frá L.A sem sendur er í smábæ í Alaska til þess að ransaka morð á stúlku, félagi hans sem er sendur með honum er úr innra eftirlitinu og á að ransaka hann í leiðinni til að reyna að finna eithvað á hann. Í morðransókninni lendir hann síðan í miklum hremmingum sem breytir atburðarrásinni svo um munar.

Stórleikarar fara með öll aðalhlutverkin, Al Pacino, Robin Williams og Hillary Swank og sína þau öll sínar bestu hliðar þó kemur Robin Williams mest á óvart í hlutverki vonda mannsins.

Myndin er mjög góð í alla staði en þó er hún kanski helst til löng þar sem maður veit allan tímann hver morðinginn er, engu að síður er myndin mjög góð og fléttan í henni alveg frábær þar sem að vondi maðurinn fer að spila svolítið með lögregluna.

Myndin brýtur nokkuð mikið af lögmálum Hollywood, þar sem að hetjan er ekki til staðar, fólk þarf að nota kollinn og hún reynir ekki að stíla mikið inn á skemtanagildið.

Þetta er mynd sem engin ætti að láta fram hjá sér fara

Insomnia er snilldargóð kvikmynd. Það ættu sem flestir að sjá hana. Það er sjaldgæft nú orðið að sjá kvikmynd sem er svo vel gerð og svo vel leikin, eins og Insomnia er. En það verður að játast að þessi mynd stenst allar mínar kröfur. Hún er allt þetta í senn, vel leikin, áhugaverð, spennandi, fyndin og listræn - myndatakan, þar sem stórkostleg náttúran fær að njóta sín, er frábær.


Það vekur einnig athygli mína að aðalframleiðendur myndarinnar eru George Clooney og Steven Soderbergh. Leikstjórinn, Christopher Nolan, leikstýrði kvikmyndinni Memento á eftirminnilegan hátt. Honum tekst nú enn betur upp, enda einvalalið með honum í verkinu. Al Pacino er mjög sannfærandi og Robin Williams kemur gjörsamlega á óvart, fylgist með honum.


Njótið!

Insomnia er mjög óvenjuleg sumarmynd, þar sem hún brýtur eiginlega allar reglur slíkra mynda. Hún krefst þess að áhorfendur noti heilann, er allt annað en hressileg, og hana skortir hetjuna sem maður er vanur að geta haldið með. Leikstjórinn Christopher Nolan (Memento) skipar sér á bekk með áhugaverðustu kvikmyndagerðarmönnum samtímans með því að taka mynd sem hefði auðveldlega getað orðið formúluspennumynd og gera hana að stílfærðri, erfiðri ráðgátu jafnvel þó maður viti allan tímann hver morðinginn er. Al Pacino er í toppformi sem Will Dormer, lögga frá Los Angeles sem er sendur til Alaska til þess að rannsaka morð. Það dimmir ekki um sumarmánuðina þar (maður kannast nú við það) og þaðan kemur titill myndarinnar. Pacino leikur Dormer mjög vel; hann verður veiklyndari og ringlaðri því lengur sem hann festir ekki svefn. Nolan nær að tjóðra Robin Williams, sem fer ekki yfirum svona einu sinni og er þar af leiðandi verulega óhuggulegur og áhrifaríkur í sínu hlutverki. Hilary Swank kemur líka vel út í rullu sem hefði getað orðið veiki hlekkur myndarinnar. Nolan fær líka plús í minni bók fyrir að setja þrjá þekkta sjónvarpsleikara (Nicky Katt, Maura Tierney, Paul Dooley) í þrjú stærstu hlutverkin á móti þremur Óskarsverðlaunahöfum. Það hristir svolítið upp í manni. Eins og áður sagði er stíll Nolans áhrifaríkur og sérstæður. Maður finnur það strax að þetta er ekki mynd eftir Joel Schumacher eða Michael Bay. Nolan notar klipparann Dody Dorn og kvikmyndatökumanninn Wally Pfister eins og hann gerði í Memento, og útkoman er stórmynd með indie-stemmningu. Insomnia er kannski aðeins of löng, og það er stundum erfitt að halda með Dormer (sem er jafngölluð hetja og Leonard var í Memento), en þetta er þrátt fyrir það gæðamynd um mitt sumar, og það er ekkert nema gott um það að segja.