Kiss of the Dragon (2001)

Mjög góð ofbeldismynd þar sem Jet Li sýnir allt sitt besta. Myndin er spennandi frá upphafi til enda. Umhverfið, París, er skemmtileg tilbreyting og að vanda klikka ekki myndir sem Luc Besson hefur komið nálægt. Jet Li skilar þessu verki af sér mun betur en í Romeo Must Die, þó hann hafi ekki slegið slöku við í þeirri mynd, en hér er líka öllu alvarlegri mynd á ferðinni.

Ég bjóst ekki við miklu þegar ég fór á þessa mynd enda aldrei verið mikið fyrir bardagamyndir en þessi mynd kom bara virkilega á óvart og var bara hin besta skemmtun í alla staði en hún fjallar um kínverska löggu í París sem lendir í klónum á gjörspilltri franskri löggu og inn í þetta flækist ung bandarísk vændiskona ágætlega leikin af Bridget Fonda og með fullri virðingu fyrir Jackie Chan þá held ég að ég megi fullyrða að Jet Li sé besti bardagamaður síðan Bruce Lee heitinn var upp á sitt besta og ég mæli hiklaust með þessari fyrir þá sem vilja sjá flotta bardagsmynd, skotheldar 3 stjörnur!

Þessi mynd er afbragðs skemmtun, fínt sjá hana í miðri viku. Frábær bardagaatriði, þar sem Jet Li lemur alla í klessu. Jackie Chan er kerling miðað við Jet. Þó svo að handritið sé ekkert sérstakt né leikurinn, þá er þetta góð sumarskemmtun með flottum bardagaatriðum. Reyndar ætti Jet Li að læra aðeins meiri ensku. Fín mynd.

Þessi mynd hefur svipaðan söguþráð og Art of War: háttsettur maður er drepinn og síðan er verið að reyna koma sökinni á aðalsöguhetjuna sem er Jet Li en eins og sönn hetja lætur hann ekki menn komast upp með það. Þetta er ein af þessum myndum sem maður gengur að og veit alveg hvernig mynd þetta er, það er að segja hasarmynd sem hefur mikið af slagsmálum í sem er gott og hún heppnast vel sem slík. Allir eru sannfærandi og leika ágætlega og því fær þessi mynd þrjár stjörnur.

Jet Li er mikill bardagasnillingur og í raun sá besti sem maður hefur séð síðan Bruce Lee var og hét. Þess vegna þótti mér alveg sorglegt að sjá að í Romeo Must Die var notast við víra og svokallað Wire-Fu til þess að láta bardagaatriðin líta sem best út. Þetta eru reginmistök, því með notkun víra getur hver sem er leikið í þessum atriðum. Því var það ánægjulegt að í þessari mynd sýnir Li án víra hversu snöggur og lífshættulegur hann í rauninni er, og gefur það bardögum myndarinnar aukið flæði og meiri spennu. Þetta skiptir miklu máli fyrir svona mynd, því bardagaatriðin eru jú það eina sem maður fer á svona mynd til þess að sjá því ekki er söguþráðurinn eða leikurinn upp á marga fiska. Það er í raun sorglegt að sjá eðalleikkonu eins og Bridget Fonda leika í mynd af þessum toga, því hennar hlutverk krafðist ekki neinna leikhæfileika og hefði í raun hvaða minniháttar Hollywood-ljóska getað leikið það. Samt sem áður, mun betri en Romeo og skemmtilega brútal. Ágætlega gerð og ekki leiðinleg, og á grundvelli góðra slagsmála get ég hiklaust mælt með þessari mynd fyrir alla þá sem vantar einhverja útrás fyrir innibyrgða reiði.

Þegar þú ferð á Kiss of the Dragon, ekki búast við frumlegum söguþræði eða besta leik sem um getur. En þú mátt búast við snilldar bardagaatriðum, hraða og góðri tónlist. Jet Li er snillingur á sínu sviði og það kemur vel fram í myndinni. Tvímælalaust með betri bardagamyndum seinni tíma!

Ég ætla nú ekki að tjá mig allt of mikið um þessa mynd...þetta er jú einu sinni bardagamynd og því ekki hægt vera skammast yfir hinu og þessu svo sem ótrúverðugum leik eða eitthvað slíkt. Maður fer væntanlega á svona mynd til að upplifa hraða og spennu en umfram allt flott og vel útsett bardagaatriði. Jet Li er auðvitað snillingur og hann kemur sínu til skila á sambærilegan hátt. Ekki skemmir svo fyrir að tónlistin er hrein snilld í þessari mynd. Söguþráðurinn..... Ja hvað með hann, hann skiptir bara ekki máli. Sem sagt með betri bardagamyndum í langan tíma, hröð, flott og vel útsettar barsmíðar.

Þetta er hin ágætasta bíómynd, tilvalin á heitum sumardegi til að kæla sig í tvo tíma eða svo. Jet Li er náttúrulega svo flottur að maður getur ekki annað en haft gaman að. Sú ákvörðun að taka myndina í París gengur vel upp því það er óvenjulegt að hafa enga vonda Ameríkana í svona mynd. Frakkarnir eru gerðir engu skítslegri og maður hlær að því... hvað er fyndnara en vondur kall með franskan hreim? Li leikur kínverskan njósnara sem er leiddur í gildru í París og hann neyðist til að berja mann og annan til að sanna sakleysi sitt. Bridget Fonda leikur ameríska portkonu sem er auðvitað sakleysið uppmálað innst inni, en hún fær lítið að gera annað en að gráta og vera lamin. Li skrifar handritið og enginn annar en Luc Besson framleiðir, svo útkoman hlýtur að vera forvitnileg. Myndin er oft bráðfyndin og tónlistin er sérlega vel við hæfi. Li er ótrúlega snöggur og hæfur bardagamaður, svo hann er augnakonfekt út af fyrir sig. Skásta bardagamynd sem maður hefur lengi séð. Gott mál.

Jet Li hefur aldrei verið í sérstöku uppáhaldi hjá mér; ég er ekki mikið fyrir martial arts myndir þó ég geti vel skemmt mér yfir þeim. Hins vegar eru Luc Besson (handritshöfundur og framleiðandi) og Bridget Fonda manneskjur sem ég hef mikið gaman af og hélt ég að gaman yrði að sjá Bridget Fonda sparka frá sér við hlið Jet Li. Ekki fékk ég nú að sjá það; Fonda gerir lítið annað en að væla út alla myndina og sparkar ekki neitt, en Jet Li stóð sig með ágætum, þ. E. þegar hann var ekki að nauðga ensku tungunni með ömurlegum framburði sínum og tilfinningalausum áherslum. Sem sagt: Hann var góður í bardagaatriðunum. Fonda var í sjálfu sér ekkert slæm, en ég vildi sjá hana taka smá Miru Sorvino-takta! Sam-evrópska súperstjarnan Tchécky Karyo leikur vonda kallinn áfallalaust og á bestu línur myndarinnar. Ekki það að það séu margar góðar línur, en þegar þær fáu sem eru til staðar koma þá er það yfirleitt hann sem fær að segja þær. Luc Besson og meðskrifarar hans voru greinilega ekki að hugsa um djúpa hasarmynd með einhverri áþreifanlegri sögu þegar þeir skrifuðu Kiss of the Dragon, heldur tel ég það mjög líklegt að handritið hafi verið skrifað á einhverju algjöru flippi því mörg atriði og margar aðstæður minna helst á fyndnar spontant-hugmyndir og virka sem brandarar í myndinni. Kiss of the Dragon virkar mjög vel þangað til tuttugu mínútur eru eftir því þá verður myndin einum of hallærisleg og svo vantar eitthvað í endann. Ég er fylgjandi því að allar hasarmyndir eigi að enda á stórri sprengingu og varð því fyrir miklum vonbrigðum þegar það var ekki einu sinni kveikt á eldspýtu í lok þessarar. Í fullkomnum heimi hefði Bridget Fonda komið í lokin með handsprengju og bazooku og sprengt allt til helvítis.