X-Men (2000)

Ég varð mjög hrifin af þessari mynd, engin vonbrigði enda hafði ég litlar væntingar. Það var góður leikur og hasarinn og tæknin af hinu besta. Hugh Jackman og Anna Paquin þóttu mér frábær og aðrir stórleikarar sinna að sjálfsögðu sínum störfum, eins og Stewart, McKellen og Berry. Ótrúlegt en satt þá var X-men 2 ennþá öflugri, það vantar lítið upp á fullt hús. Það sem mér, sem aðdáenda myndasagna en þó vanvirks lesanda þeirra, fannst svo frábært við báðar myndirnar var persónusköpunin -hún skipti engu minna máli en hasarinn og spennan. Það hlýtur að vera erfitt að vera svona rosalega öðruvísi... stökkbreyttur og dæmdur til að lenda í vandræðum oftar en ekki! Án þess að rekja söguþráðinn þykir mér X-men frábær skemmtun sem enginn ætti að missa af (enda hafa líklega fáir gert það).

BRILLIANT!!!!!!!!!

HREIN SNILD, SNILDIN EIN.

Þessi mynd er eitt af Marvel myndunum, gerðar frá myndasögum, og við þekkjum aðrar Marvel-teiknimynda myndir eins og t.d.

Blade, Spiderman the movie, Daredevil og Hulk(sem eru að fara koma út) og að auki X2 eða X-men 2 sem er væntaleg á næstu 2 árum og er, eins og má heyra frammhald þessari hér mynd.

Stan Lee sem er höfundur X-men og flest allt krú Marvel hetjanna er snillingur og sannar hann það enn og aftur með hjálp þriggja manna, handrits höfundunum þeim; Tom DeSanto og David Hayter, plús leikstjóranum unga, Bryan Singer.

Þessi mynd er frábær, og heldur söguþræðinum vel, en ég gef því 3 stjörnur til hennar því að það vantar hetjur eins og t.d. Beast og Morph.

Ágætis spennumynd með gamansömu ívafi gerð eftir samnefndum teiknimyndasögum og fjallar um hóp stökkbreyttra einstaklinga og baráttu þeirra við eitursnjallan brjálæðing sem ætlar að koma af stað stríði. Svolítil klisja og vantar smá krydd en er vel horfanleg.

X-MEN var myndin. Maður beið spenntur eftir að sjá loks meistaraverkið, eftir flott atriði úr trailernum. Og loks kom að því. Því miður stóðst myndin engan veginn undir væntingum mínum. Tæknibrellurnar voru fínar svo langt sem þær náðu en maður byggir ekki upp sögu með tæknibrellum. Persónurnar voru frekar grunnar og manni var nokkuð sama hvor vann "vondu karlarnir" eða þeir "góðu". Reyndar voru vondu karlarnir skemmtilegri, og Mystique stendur upp úr fyrir flotta takta og útlit. Söguþráðurinn var gamall og úrsér genginn 007 dæmi. Leggja heiminn undir sig og auðvitað þurfti að byrja á því uppi á frelsisstyttunni. Dæmigert fyrir Kanann. Þoturæfillinn sem ég hafði beðið spenntur eftir kláraði trailer atriðið sitt og þar með var það búið. Nokkur undarleg hlátrasköll gusu upp af litlu tilefni finnst mér, en sjálfsagt hefur myndin verið sérhönnuð fyrir hasarmynda áhugamenn. Sumsé slök mynd með flottum brellum. Kannski maður kíki bara í góða bók næst.

Mikið ljómandi kom þessi ræma mér skemmtilega á óvart. Hún er bara hress og skemmtilegt og tiltölulega í takt við blöðin, sem undirritaður safnaði í æsku. Wolferine, eða Jarfi eins og hann heitir á íslensku, er þarna settur í aðalhlutverk og stendur sá leikari, Hugh Jackman, sig stórvel og hlakka ég til að sjá hann oftar. Gömlu kallarnir, Ian McKellen úr Ríkharði þriðja og Patrick Stewart úr Star Trek, eru líka flottir eins og alltaf. Vil ég benda þeim sem eiga eftir að sjá ræmuna á að mæta tímanlega til að missa ekki af stórgóðu byrjunaratriði, þegar Magneto er kynntur til leiks.

Æðisleg kvikmynd! Mjög góðar tæknibrellur og leikararnir standa sig vel. Endirinn er samt svolítið asnalegur (að því leiti að myndin endar eiginlega ekki). Besta ofurmannamyndinn sem að ég hef séð!

Ég var búin að bíða eftir þessari mynd í svo langan tíma og fór svo á hana, en fannst hún svo leiðinleg að ég fór þegar fyrri hlutinn var búinn. En ég ákvað að gefa henni eitt tækifæri enn og ég tók hana á leigu og ég verð að segja að þetta er brilliant mynd. Tæknibrellurnar eru ótrúlegar í myndinni og svo eru þau sem leika Toad og Mistique og allir sem leika X-mennina mjög góðir. Og hún er stundum fyndin á köflum.

X-Men er sennilega sú mynd sem hvað mest hefur verið skrifað um undanfarin ár, bæði í fjölmiðlum og sérstaklega á netinu. Aðeins nýju Star Wars-myndirnar hafa fengið svipaða umfjöllum. Enda ástæðan einföld; X-Men hafa í tæp 40 ár verið eins langvinsælasta teiknimyndasaga heims og aðeins Superman, Batman, og Spiderman eru þekktari en þessi hópur stökkbreyttra mannvera. Stan Lee og Marvel hafa setið á sér árum, ef ekki áratugum, saman og látið alla aðdáendur sína bíða vel og lengi eftir þessari. Enda ekki skrýtið þegar litið er á hvernig myndum um hvers kyns ofurhetjur hefur gengið undanfarið. Hver man eftir Punisher, Captain America, og svoleiðis sorpi? Fyrsta Batman-myndin var í raun sú fyrsta sem eitthvað var varið í. Blade sannaði að það var hægt að gera svona myndir án þess að þær rynnu út í vitleysu, og það var um svipað leyti sem tilkynnt var að Bryan Singer, leikstjóri The Usual Suspects, hefði verið valinn til þess að leikstýra X-Men. Þetta lofaði strax góðu. Þá tók við heillangt tímabil þar sem hver einasti maður vildi fá að ráða hver myndi leika hvaða hetju. Patrick Stewart var í raun sjálfkjörinn sem Charles XavierPrófessor X, og hörðustu áhangendurnir voru mjög sáttir við hann. Sömuleiðis voru fáir sem andmæltu Famke Janssen sem Jean Grey, James Marsden sem Scott SummersCyclops, og Ray Park sem Mortimer ToynbeeToad. Það var mikið deilt um hina. Halle Berry var mjög óvinsæll kostur í hlutverk Ororo MunroeStorm, og Anna Paquin kom mörgum á óvart sem Rogue. Margir hváðu þegar Ian McKellen varð Erik LensherrMagneto og Rebecca Romijn-Stamos fékk að leika Raven DarkholmeMystique. Og það vissi enginn hverjir þeir Hugh Jackman sem LoganWolverine og Tyler Mane sem Sabretooth voru. Ég er mjög glaður að geta sagt að eftir allt sem er á undan gengið er myndin nær fullkomin. Hún er, ásamt Batman 1, langbesta ofurhetju-teiknimyndasögumynd sem gerð hefur verið. Það er þéttur söguþráður, enginn í myndinni er einföld pappapersóna, og útlitið er frábært. Ég er ekki einn af þeim sem les X-Men og hef reyndar ekki lesið eitt einasta blað í a.m.k. 12 ár, en ég kunni samt að meta að Singer gleður þá sem til þekkja með að sýna fleiri þekktar ofurhetjur, þó stutt sé. Iceman, Pyro, Cannonball, Kitty Pryde, Jubilee og fleiri skjóta upp kollinum. Ég er gífurlega sáttur við lokaútkomuna hér. Jackman er stórgóður sem Wolverine og á eftir að gera stóra hluti. Anna Paquin er jafnframt framar vonum sem Rogue. Ray Park er bráðfyndinn sem Toad (takið eftir Darth Maul-töktunum) og Mystique er flottari en andsk... Meira að segja Halle Berry er trú sinni persónu og talar með suður-afrískum hreim og stendur sig eins og... ja, hetja. Tæknibrellur eru fyrsta flokks og Michael Kamen hefur samið frábæra tónlist. Góð fyrir alla, ekki bara þá sem lesa X-Men oftar en Morgunblaðið. Svo er bara að bíða eftir X-Men 2... að ógleymdri þeirri ósk að Spider-Man, Hulk, Silver Surfer, Daredevil og Fantastic Four-myndirnar verði jafngóðar og X-Men. Ein kvörtun: OF STUTT! Hlakka til að sjá Director's Cut, sem er víst góðum hálftíma lengri.

Mögnuð mynd. Ég er alls ekki X-men aðdáandi og hef aldrei séð X-men teiknisögublað - en mér fannst þetta mjög góð mynd. Sagan er sniðug og tæknibrellurnar eru frábærar. Slagsmálaatriðin eru líka mjög flott. X-MEN 2 verður örugglega flott.

Ég hef beðið spenntur eftir X-Men í svolítinn tíma og þykir mér því leitt að segja að hún sé alls ekkert sérstök. Mér finnst jafnvel enn leiðinlegra að segja það vegna þess að það er svo margt gott við hana, en það hefði flest allt getað verið betra. Myndin sjálf er týpísk myndasögumynd; hópur af stökkbreyttum hetjum berst við annan hóp af stökkbreyttum illmennum sem hafa skapað dómsdagsvél sem mun drepa svo-og-svo marga. Forsprakki góðu kallanna er viturt gamalmenni sem ælir út úr sér visku og gáfulegum setningum og aðal góði kallinn er óheflaður ungur maður sem er illa við að láta stjórna sér. Svona alvöru tough-guy. Forsprakki vondu kallanna er gamall vinur hins forsprakkans og ætlar að hefna sína á heiminum vegna einhvers ómerkilegs. Honum fylgja dyggir fylgismenn sem hika ekki við að drepa. Við vitum það flest að klipptar voru um 40 mínútur af myndinni til þess að halda tempói en það kemur illa út fyrir persónur myndarinnar. Og þegar persónur koma illa út í mynd sem gerir út á persónurnar og hæfileika þeirra er ekki annað hægt að segja en að kvikmyndagerðamönnunum hafi brugðist bogalistin; X-Men er misheppnuð. En ekki taka þessi orð of alvarlega. Þegar ég segi misheppnuð þá meina ég aðeins að það sem hefði mögulega getað verið frábær mynd varð aðeins sæmileg mynd. Myndin er samt sem áður ekki mjög misheppnuð, það eru góð atriði, flottar brellur og ýmislegt annað gott við hana, en mér fannst eitthvað vanta og mér leið eins og ég hefði bara séð 34 af heilli mynd. Það bara vantaði eitthvað. Bryan Singer stendur sig með ágætum sem leikstjóri en það verður bara að setja út á það hversu grófur hann var í klippiherberginu. Persónurnar í þessari mynd eru mjög áhugaverðar og gaman að fylgjast með þeim leika sínar listir en mér finnst eins og Singer hafi verið nokk sama um, hvað skal segja, tilgang persónanna; þrátt fyrir að við vitum alltaf hvaða karakterar eru vondir og góðir fannst mér að Singer væri eiginlega alveg sama og vildi bara sýna okkur hvað þeir gætu gert. T.d. í einu atriði er Wolverine að berjast við Mystique og ég vonaði það innilega að Mystique myndi vinna bardagann - bara vegna þess að Mystique er flott persóna með flottan líkama. Mér var alveg drullusama um Wolverine, sem á samt sem áður að vera aðalpersónan og hetja myndarinnar. Mér var í raun og veru sama um allar persónurnar nema Rogue. Rogue er eina stökkbrigðið sem við finnum til með vegna þess að kraftar hennar vinna á móti henni. Hún á aldrei eftir að geta snert annað fólk og við vorkennum henni þess vegna. Ekki sakar það að Anna Paquin leikur Rogue og gerir það mjög vel. Mér finnst það líka stór galli að vonda fólkið er alls ekkert vont. Magneto, aðalvondikallinn, gerir aldrei neitt sem sýnir hreina illsku. Hann veit ekki einu sinni að dómsdagsvélin hans muni drepa fólk. Magneto sér heldur ekki um drápin, það er starf þeirra Sabretooth, Toad og Mystique. Þið vitið hvað mér finnst um Mystique en ég get ekki sagt hið sama um Toad og Sabretooth. Þessir kallar voru svo ómerkilegir að ég trúði því aldrei að þeir gætu ollið neinum verulegum skaða, enda gera þeir það ekki. Þeir drepa einn og einn öryggisvörð en þeir ógnuðu aldrei X-mönnunum það mikið að maður var hræddur um framtíð þeirra. Stærsti gallinn við X-Men er kannski sá að myndin er full af áhugaverðum persónum sem við fáum aldrei að vita neitt um og þegar við vitum lítið um bæði hetjurnar og óvinina þá er okkur meira og minna sama um afdrif þeirra. Það eru fleiri gallar við X-Men; tiltölulega leiðinleg sagan, ömurlega léleg tónlist eftir Michael Kamen sem hefði átt að kynna sér John Williams (Superman) eða Danny Elfman (Batman), og svo allur tómleikinn sem fylgir þessu öllu saman. Ef ég ætti að bera þessa mynd saman við aðrar ofurhetju myndir lendir hún neðarlega á listanum. Batman er betri, svo og Batman Returns og Blade. Ég mynd setja X-Men aðeins ofar en Batman Forever, en alls ekki lengra. Þegar allt kemur til alls er X-Men skemmtileg mynd en tóm, full af loforðum sem hún efnir ekki.