8MM (1999)

8 mm er mér vitanlega fyrsta spennumyndin með einhverri tilvitnun í snuff-myndir og þar af leiðandi að vissu leyti frumleg, en einhvern veginn nær aldrei flugi að neinu marki. Mikið auglýst sem verk sama höfundar og Seven, en ekki nærri því jafn spennandi, ógeðsleg eða góð - kannski ekki réttlátur samanburður. Þótt Cage hafi oft gert betur er hann samt betri en flestir aðrir og Phoenix stelur að vissu marki senunni þegar hann fær að vera með. Aðrir karakterar heldur sterílir flestir og myndin ekki líkt því jafn ógeðsleg og ég bjóst við - eða vonaði. Sívælandi og leiðinleg eiginkonan skemmir líka og beið ég spenntur eftir að hún yrði drepin. En samt - Cage er alltaf Cage og myndin inniheldur margt flott og nokkur spennandi og skemmtileg atriði og er þegar allt kemur til alls yfir meðallagi, þannig að þrátt fyrir smá vonbrigði splæsir maður tveim og hálfri.....

Kvikmynd frá leikstjóranum Joel Schumacher "sem hefur gert t.d. Flatliners, The Lost Boys, Falling Down, The Client og A Time to Kill". Handritið er hins vegar eftir Andrew Kevin Walker, en hann skrifaði t.a.m. handritið að smellunum "Seven" og "The Game". Óskarsverðlaunaleikarinn Nicolas Cage er hér í aðalhlutverki ásamt mörgum öðrum frábærum leikurum. En að söguþræðinum. Hér segir frá einkaspæjaranum Tom Welles "Cage" sem hefur fram að þessu aðallega tekið að sér störf sem tengjast framhjáhaldi og þess háttar. Þess utan lifir hann rólegu fjölskyldulífi með eiginkonu sinni og ungri dóttur. En þetta á allt eftir að breytast dag einn þegar auðug ekkja hefur samband við hann og afhendir honum til rannsóknar 8MM filmu sem hún hafði fundið í peningaskáp nýlátins eiginmanns síns. Á filmunni sést hvar ungri stúlku er misþyrmt á hrottalegan hátt og hún síðan myrt. Þótt Welles hafi ætíð kosið að stunda "áhættulaus" einkaspæjarastörf hefur hann þó oft látið sig dreyma um að takast á við eitthvað bitastæðara í rannsóknum sínum. Hann ákveður því að reyna að komast til botns í því hver eða hverjir stóðu að baki gerðar þessarar óhugnanlegu myndar. Ekki líður á löngu uns hann er kominn á sporið og tekst að uppgötva hver hin unga stúlka var. Rannsóknin leiðir hann síðan til undirheima Los Angeles og þaðan til New York og smám saman áttar hann sig á því að málið er mun flóknara og hættulegra en hann gat órað fyrir. Um leið verður hann stöðugt ákveðnari í að komast til botns í því jafnvel þótt hann viti að hinn hrikalegi sannleikur málsins gæti kostað hann lífið. Grimm og óvægin en á tíðum hin ágætasta mynd, en það er samt eitthvað sem dregur hana niður (jafnvel um hálfa stjörnu), hún er ótrúverðug og ótrúleg en það breytir því ekki að Nicolas Cage er góður í sinni rullu. Ég gef 8MM þrjár stjörnur. Hún er ágætis afþreying en er ekki minnisstæð í huga manns þegar að frá líður

8mm er ein af þeim subbulegustu myndum sem ég hef séð. Nicolas Cage gerði huge mistök með að samþykkja að leika í henni. Ógeðsleg og gróf.Lýsir heimi klámheimsins og perrana. Samt kemur söguþráðurinn svoldið á óvart. Ekki velja þessa á næstu leigu.

Ég vill byrja á því að segja að 8MM eru örugglega mestu vonbrigði sem ég hef upplifað. Ókei, hún er vel gerð - Joel Schumacher sýnir hér að hann getur gert annað en algjöran skít eins og Batman & Robin - og vel leikin, þrátt fyrir gríðarlegan ofleik Nicolas Cage. En það er eitt vandamál: Andrew Kevin Walker getur engan veginn gert handrit sem er næstum því jafn áhugavert, gott og skemmtilegt og Se7en. 8MM byrjar sem mjög áhugaverð mynd, umfjöllunarefnið er hæfilega taboo og allt er mjög fínt. En hún kafar aldrei nógu mikið ofan í allan snuff-mynda heiminn og eftir smá stund er hún orðin pirrandi. Músikin hjálpar ekki mikið heldur, Mychael Danna leikur sér að ömurlegum kórum, synthesæserum og drungalegum Howard Shore-töktum en skapar aldrei spennandi tónlist. Handritið er heldur ekki spennandi. Umfram allt er þessi mynd algjör vonbrigði - ekki sjá hana.

Ágætis spennutryllir um einkaspæjaran Tom Welles, leikinn af Nicholas Cage, sem fær það verkefni að sannreyna hvort að verknaður sem sýndur er á filmuræmu er raunverulegur eða plat. Til þess að komast til bots í málinu þarf hann að kafa ofan í heim kláms og öfuguggaheita og það kemur fljótt í ljós að þetta er stærra og erfiðara mál en hann hélt í upphafi. Ég var töluvert spenntur fyrir þessari mynd þar sem hér er að verki sami handritshöfundur (Andrew Kevin Walker) og skrifaði handritið fyrir Seven, sem er að mínu mati eitt snjallasta handrit síðari ára. Myndin olli mér ekki vonbrigðum en hún er samt ekki af sama kalíber og Seven. Hún fór dálítið rólega af stað en það er virkileg spenna í seinni hálfleik. Fínasta afþreying en samt ekki fyrir viðkvæma.