Hinn stórgóði Mark Ruffalo hefur gengið til liðs við leikstjórann Louis Leterrier, en Ruffalo mun taka að sér eitt aðalhlutverkanna í Now You See Me. Myndin mun fjalla um Alríkislögreglumann, leikinn af Ruffalo, sem eltir niður hóp galdramanna sem nota kunnáttu sína til að ræna banka.
Myndin skartar nú þegar Jesse Eisenberg úr The Social Network og Mélanie Laurent, sem vakti mikla athygli í Inglorious Basterds. Hin unga Amanda Seyfried hefur sömuleiðis tekið að sér hlutverk í myndinni, sem tæknisnillingur sem smíðar hin ýmsu tæki og tól fyrir hina göldróttu glæpamenn.
