Óskarsverðlaunaleikkonan Jennifer Lawrence var í einn dag á tökustað Dumb and Dumber to þar sem hún lék hlutverk persónu Kathleen Turner á yngri árum, samkvæmt frétt The Hollywood Reporter.
Samkvæmt heimildum vefmiðilsins þá fara tökur á þriðju Hunger Games myndinni, The Hunger Games: Mockingjay, fram skammt frá tökustað Dumb and Dumber to, og sagt er að leikaralið Hunger Games hafi heimsótt tökustað Dumb and Dumber to. Jennifer Lawrence hafi síðan leikið gestahlutverk ( cameo ) á meðan hún var á staðnum.
Eins og við höfum sagt frá hér á kvikmyndir.is þá fjallar Dumb and Dumber 2 um það þegar þeir vinirnir Lloyd Christmans og Harry Dunne, sem leiknir eru af Jim Carrey og Jeff Daniels, fara að leita að týndri dóttur Harry.
Í nýlegu viðtali í spjallþætti Jimmy Fallon sagði Lawrence að fyrsta myndin, Dumb and Dumber, væri á meðal uppáhalds gamanmynda hennar: „Ég kann Dumb and Dumber utan að, sem og Step Brothers og Anchorman,“ sagði Lawrence. Þegar Fallon bað hana að fara með ákveðna línu úr myndinni þá var leikkonan með það algjörlega á hreinu, eins og sést í meðfylgjandi myndbandi:
