Tónlistarmaðurinn Frank Ocean hefur sett á netið nýtt lag sem átti að vera í mynd Quentins Tarantino, Django Unchained.
Ocean samdi lagið Wise Man sérstaklega fyrir vestrann. Tarantino hefur áður sagt í viðtali við Rolling Stone að hann hafi hvergi fundið pláss fyrir lagið í myndinni.
„Frank Ocean samdi frábæra ballöðu sem var bæði indæl og ljóðræn.Því miður var bara ekki pláss fyrir hana í neinu atriði,“ sagði leikstjórinn. „Ég hefði getað hent því inn í myndina bara til að hafa það með. En hann samdi það ekki til þess og ég vildi ekki gera lítið úr þessu framlagi hans.“
Ocean hefur nú sett lagið á Tumblr-síðuna sína með skilaboðunum: „Django var frábær án þess“.
Hérna er hægt að heyra lagið Wise Man.
Django Unchained kemur út á jóladag í Bandaríkjunum.
