Ein af athyglisverðari persónum í hinni stórskemmtilegu Kingsman: The Secret Service, sem enn er verið að sýna hér á landi, er hinn hníf-leggjaði leigumorðingi Gazelle í túlkun Sofia Boutella, en hún var illviðráðanleg í myndinni svo ekki sé meira sagt, og sneyddi mann og annan í herðar niður með hárbeittum hnífum sem hún var með á fótunum.
Boutella hefur nú verið ráðin í stórt hlutverk í Star Trek 3, sem Justin Lin leikstýrir, eftir handriti eins af leikurum myndarinnar, Simon Pegg, og Doug Jung.
Deadline vefritið segir frá þessu, en fleiri upplýsingar liggja ekki fyrir að svo stöddu um hlutverkið.
Áætluð frumsýning er 8. júlí, 2016.
