Kvikmyndatónskáldið og Óskarsverðlaunahafinn Hildur Guðnadóttir segir frá því í nýju viðtali við Screen Daily að hún hafi smíðað heilan hljóðheim úr beinum fyrir 28 Years Later: The Bone Temple, framhald hrollvekjunnar 28 Years Later.
Í viðtalinu lýsir Hildur því hvernig hún bjó til eins konar „beinasveit“ fyrir myndina. Hún hafði samband við vin sinn sem rekur hamborgarastað og komst þannig í samband við slátrara sem lét hana fá afganga. Beinin voru soðin, mergurinn hreinsaður úr þeim og síðan hófst tilraunavinnan: hvaða hljóð má ná úr efni sem tengist beinagrindum, líkama og dauða á svo beinan hátt?
Útkoman virðist hafa verið afar líkamleg tónlist. Í stað þess að nálgast myndina eingöngu með hefðbundnum strengjum eða rafhljóðum vann Hildur með slagverk og hljóðfæri úr beinunum sjálfum. Það passar vel við heim 28 Years Later, þar sem hryllingurinn er ekki aðeins í sögunni heldur líka í áferðinni.
Heiðursgestur
Hildur er jafnframt heiðursgestur World Soundtrack Awards í ár, þar sem Brussels Philharmonic flytur úrval úr verkum hennar á lokahátíðinni. Hún er einnig tilnefnd sem kvikmyndatónskáld ársins fyrir þrjú verkefni: The Bride!, 28 Years Later: The Bone Temple og Hedda.
Í sama viðtali ræðir hún einnig tónlistina í Hedda, nýrri mynd Niu DaCosta, þar sem jazz-slagverk, öndun og raddir koma við sögu, og vinnuna við The Bride! eftir Maggie Gyllenhaal. Þar þurfti hún að finna jafnvægi milli dramatískrar ástarsögu og villtrar pönk- og rokkorku.
Hildur hefur á síðustu árum orðið eitt stærsta nafn heimsins í kvikmyndatónlist. Hún hlaut Emmy-, BAFTA-, Grammy- og World Soundtrack-verðlaun fyrir Chernobyl og vann Óskar, BAFTA, Golden Globe og World Soundtrack-verðlaun fyrir Joker. Með beinasveitinni í 28 Years Later virðist hún enn vera að leita að nýjum leiðum til að láta kvikmyndir hljóma öðruvísi.
Heimild: Screen Daily
