Sena heimsfrumsýnir Wall Street 2 á föstudag 24. september í Smárabíói, Laugarásbíói og Borgarbíói Akureyri. Í fréttatilkynningu frá Senu segir eftirfarandi um myndina: „Michael Douglas er mættur aftur í hlutverkið sem færði honum Óskarsverðlaunin – sem hinn alræmdi peningaskúrkur Gordon Gekko í stórmynd eftir Oliver Stone. Eftir að hafa setið af sér 14 ára fangelsisdóm er honum sleppt úr haldi en honum finnst hann ekki passa lengur í þann heim sem hann réði eitt sinn yfir. Í viðleitni sinni til að bæta úr samskiptaleysi sínu við dóttur sína Winnie (leikin af Carey Mulligan), myndar Gekko bandalag með unnusta hennar Jacob (Shia LaBeouf) sem sjálfur er mjög farsæll fjárfestir. En geta Jacob og Winnie treyst Gekko sem hyggur á hefndir og ekki bætir úr skák að komin er fram á sjónarsviðið ný tegund af miskunnarlausum fjármálamönnum eins og Bretton James (leikin af Josh Brolin) sem svífast einskis! Með önnur hlutverk fara Frank Langella og Susan Sarandon.“
