Keanu Reeves var nýlega staddur í London School of Performing Arts þar sem hann talaði við nemendur um feril sinn og hvernig hægt væri að vinna sem ungur leikari. Meðal þeirra kvikmynda sem hann talaði um voru Bill & Ted serían og væntanlegt framhald í henni, en gríðarlega athygli vakti þegar einn nemandinn spurði um Matrix seríuna.
Reeves sagðist hafa hitt Wachowski-bræðurna, mennina bakvið Matrix seríuna, nú laust fyrir jól og hafa þeir lokið vinnu við tvö ný Matrix handrit. Segir Reeves myndirnar eiga að vera í hinni sívinsælu þrívídd og hafa bræðurnir fundað með leikstjóranum James Cameron vegna þessa. Sjálfur sagðist Keanu hlakka til að leika ofurhugann Neo aftur og lofar að næstu Matrix myndirnar muni gjörbylta kvikmyndaiðnaðinum, rétt eins og sú fyrsta.
– Bjarki Dagur
