Nýlega var gengið frá því að kvikmyndinni Bergmál eftir Rúnar Rúnarsson yrði dreift í almennar sýningar í tuttugu og fimm kvikmyndahúsum í Hollandi og geta þarlendir kvikmyndahúsagestir því barið Bergmál augum frá og með 12 desember nk. Þetta kemur fram í tilkynningu frá framleiðanda.
Holland er samkvæmt tilkynningunni tíundi dreifingarsamningurinn sem gengið hefur verið frá og samningaviðræður við fleiri svæði standa yfir. Franska dreifingarfyrirtækið Jour2féte sér um alheimsdreifingu Bergmáls sem verður frumsýnd á vegum Senu á miðvikudaginn, 20. nóvember.
Bergmál hefur verið að ferðast á milli kvikmyndahátíða síðan í haust þegar myndin var heimsfrumsýnd í aðalkeppni alþjóðlegu kvikmyndahátíðarinnar í Locarno í Sviss og hlot þar aðalverðlun dómnefndar unga fólksins. Nokkru seinna fékk Bergmál verðlaun fyrir bestu leikstjórn á Seminci, alþjóðlegu kvikmyndahátíðinni í Valladolid á Spáni og síðan verðlaun Lúthersku kirkjunnar í Lubeck í þýskalandi.
Í tilkynningunni segir að Bergmál hafi fengið mikla athygli fyrir óvenjulega nálgun í frásögn. Í gegnum fimmtíu og átta sjálfstæðar senur, dregur Bergmál fram húmor, sorg og fegurð í nútíma samfélagi í aðdraganda Jóla.
Opinber söguþráður kvikmyndarinnar er eftirfarandi:
Á meðan Ísland er í óða önn að gera sig tilbúið fyrir hátíðarnar, er einkennilegt andrúmsloft að falla yfir landið og fólk finnur bæði fyrir spennu og áhyggjum. Eyðibýli stendur í ljósum logum í sveitinni, í grunnskóla eru krakkar að leika í jólasöngleik, í sláturhúsi, dángla nauta skánkar, í miðju safni stendur kona og rífst í símann, ungur strákur fær ömmu sína til að prófa nýju sýndarveruleika gleraugun sín…
Í gegnum fimmtíu og átta sjálfstæðar senur, dregur Bergmál fram húmor, sorg og fegurð í nútíma samfélagi í aðdraganda Jóla.
