Sögur af endurkomu njósnara hennar hátignar Austin Powers, hafa verið ögn ónákvæmar, en við hér á kvikmyndir.is sögðum frá því um daginn að Mike Myers, sem leikur njósnarann, skrifar handrit og er allt í öllu hvað Austin Powers varðar, hafi verið búinn að skrifa undir samning um að leika í mynd nr. 4. Svo er víst ekki.
TheWrap greinir frá því að Myers hafi ekki skrifað undir ennþá, en viðræður standi yfir, og hefur TheWrap það eftir upplýsingafulltrúa leikarans Ina Treciokas.
Fyrstu þrjár Austin Powers myndirnar voru mjög vinsælar og tekjur af þeim voru samanlagt 675 milljónir Bandaríkjadala á alheimsvísu. Síðasta mynd í seríunni var frumsýnd árið 2002.
Myers hefur haft frekar hljótt um sig síðan þá. Hann lék gestahlutverk í Inglorious Basterds, og talar fyrir Shrek í samnefndum teiknimyndum. Love Guru floppaði síðan illilega árið 2008.