Græna ljósið frumsýnir finnsku kvikmyndina Purge í Bíó Paradís á föstudaginn, 26. október. Myndin er byggð á samnefndri metsölubók eftir Sofi Oksanen. Bókin kom út á íslensku árið 2010 undir nafninu Hreinsun og naut mikillar hylli íslenskra lesenda.
Í fréttatilkynningu frá Græna ljósinu segir að Hreinsun hafi verið meðal umtöluðustu skáldverka undanfarinna ára. „Leikritið var frumflutt í finnska Þjóðleikhúsinu árið 2007 og í kjölfarið skrifaði höfundurinn skáldsögu upp úr efni þess sem farið hefur líkt og eldur í sinu um Evrópu, víða orðið metsölubók og sankað að sér verðlaunum. Þjóðleikhúsið sýndi leikritið byggt á bókinni á síðast leikári og tóku áhorfendur og gagnrýnendur því einkar vel.“
Söguþráðurinn er eftirfarandi: Aliide hefur upplifað hrylling Stalínstímans og nauðungarflutninga Eistlendinga til Síberíu. Sjálf hefur hún mannslíf á samviskunni og er þjökuð af sektarkennd. Nótt eina árið 1992 finnur hún unga konu við hús sitt, þetta er Zara sem hefur sloppið úr klóm rússnesku mafíunnar þar sem hún var kynlífsþræll. Aliide kemst að því að Zara er skyld henni. Saman leggja þær í mikla háskaför á vit skelfilegrar fortíðar í Eistlandi Sovéttímans.
Sjáið stiklu úr myndinni hér að neðan: