Leikararnir svipmiklu Danny Trejo og Vinnie Jones leika í hryllingsmyndinni Reaper, ásamt Gabriel Jarret, Jake Busey, William Shockley og Shayla Beesley.
Tökur eru nú þegar hafnar í Los Angeles, samkvæmt Variety kvikmyndavefnum.
Handrit skrifa þeir James Jurdi og Mark James, en myndin fjallar um aftöku sem fer úr skorðum, og djöfulleg skepna leysist úr læðingi og hrellir samfélagið.
Aðdáendur Trejo geta barið hann augum næst í mynd Robert Rodriguez, Machete Kills, sem við höfum sagt frá hér á kvikmyndir.is reglulega, en myndin er önnur myndin um Machete – sú fyrri kom út árið 2010. Machete Kills verður frumsýnd 4. október.
Jones mun næst birtast á hvíta tjaldinu í myndinni Escape Plan ásamt engum öðrum en höfðingjunum Arnold Schwarzenegger og Sylvester Stallone. Sú mynd verður frumsýnd 18. október.