Fyrsta stiklan er komin út fyrir nýja John Travolta hefndarspennutryllinn I Am Wrath, en með honum í myndinni eru leikararnir Christopher Meloni, Sam Trammell, Amanda Schull, Asante Jones og Rebecca De Mornay m.a.
Myndin segir frá Stanley Hill, atvinnulausum fjölskyldumanni sem er í miklu basli vegna efnahagsþrenginga síðustu ára, en fer til Kaliforníu að sækja um starf, sem hann fær. Kona hans, Vivian, skipuleggur rómantíska fagnaðarfundi þegar hún kemur og sækir hann á flugvöllinn. En hópur af eiturlyfjaneytendum ræðst á þau og drepur konuna. Hill er niðurbrotinn, búinn að missa eiginkonuna og viljann til að lifa. Hann ákveður að leita hefnda þegar kerfið bregst, og þeir grunuðu eru ekki saksóttir.
Hann fær í lið með sér fyrrum sérsveitarmann til að myrða miskunnarlausan dópsala og mögulega ljóstra upp um meiriháttar samsæri.
Myndin verður gefin út á VOD í Bandaríkjunum 15. apríl nk. og fer í bíó mánuði síðar, 13. maí.
