Stiklan fyrir vísindaskáldskapsspennumyndina Total Recall með Colin Farrell, Bryan Cranston, Kate Beckinsale og Jessica Biel í aðalhlutverkum er (opinberlega) komin út og hún veldur ekki vonbrigðum! Total Recall er endurgerð samnefndrar myndar frá 1990 með Arnold Schwarzenegger í aðalhlutverki sem flestir sci-fi nördar ættu að kannast við.
Endurgerðin verður víst talsvert frábrugðin upprunalegu myndinni. Ekkert verður farið til Mars í nýju myndinni, til dæmis, en þess í stað hefur heimurinn skipst í tvö lönd; EvróAmeríku og Nýja-Shanghai. Farrell fer með hlutverk Douglas Quaid sem starfar í verksmiðju en fer að dreyma ansi undarlega drauma og fer að trúa því að hann sé í raun njósnari.
Stiklan segir meira en þúsund orð, það er allavega ljóst að Colin Farrell er rugl svalur, Beckinsale er harðasta gella í heimi (svona næstum því) og ekkert hefur verið til sparað í Hollywood tæknibrelluælunni.
Stikluna má sjá hér fyrir neðan (HD gæði hér)
Totall Recall kemur í kvikmyndahús 10.ágúst.
Þó svo að ég efa að Colin (og endurgerðin) nái að standa sig jafn vel og Schwarzenegger og upprunalega myndin þá verð ég að játa að ég er ansi spenntur. Hvað finnst þér ?