Framleiðslufyrirtækin StudioCanal og Film4 tilkynntu í dag að tökur á kvikmyndinni Macbeth væru hafnar, og mun hún verða mynduð í Skotlandi næstu sjö vikurnar.
Kvikmyndin er byggð á klassísku verki eftir William Shakespeare og verður leikstýrð af Justin Kurzel, sem á aðeins tvær kvikmyndir í fullri lengd að baki. Í aðalhlutverkum verða Michael Fassbender og Marion Cotillard. Kvikmyndin mun einnig skarta Paddy Considine, David Thewlis, Sean Harris, Jack Reynor og Elizabet Debicki.
Macbeth fjallar um miskunnarlausan og metnaðargjarnan skoskan lávarð sem nær völdum í Skotlandi með hjálp undirförular eiginkonu sinnar og þriggja norna. Myndin mun gerast á 11. öld og verður upprunalegur texti Shakespeare notaður.
Þetta er ekki í fyrsta skipti sem Macbeth ratar á hvíta tjaldið og hafa leikstjórar á borð við Roman Polanski, Orson Welles, Geoffrey Wright og fleiri gert myndir um þessa klassísku persónu.
Macbeth er áætluð til sýninga á næsta ári.
