Leikarinn og leikstjórinn Kevin Smith er diggur aðdáandi Star Wars og þar að auki góðvinur leikstjórans J.J. Abrams, þar af leiðandi fékk hann að fara í heimsókn á tökustað nýjustu Star Wars-myndarinnar.
Smith tók mynd af sér tárvotum og skrifaði undir myndina: „Heimsótti JJ og tökustað EP VII. Ég skrifaði undir samning, þannig eina sem ég get deilt með ykkur eru þessi tár. Mátturinn er með þessari mynd. Heilagur Sith“.
Smith er þessa dagana að vinna að mynd um jólaófreskjuna Krampus. Leikstjórinn hefur fengið til síns liðs fyrrum barnastjörnuna Haley Joel Osment til þess að leika í myndinni. Einnig hafa þau Justin Long, Genesis Rodriguez og Michael Parks verið staðfest í leikarahópinn.
Star Wars: Episode VII er væntanleg í kvikmyndahús þann 15. desember, 2015, og á að gerast 30 árum eftir að Return of the Jedi gerðist.
