Ákveðið hefur verið að gera framhald af Will Ferrell gamanmyndinni vinsælu Step Brothers frá árinu 2008. Tökur á myndinni munu fara fram í Lynwood í Kaliforníu næsta sumar. Maywoodpost.com greinir frá þessu.
Fregnir herma að allir upprunalegu leikararnir snúi aftur, þar á meðal Ferrell, John C. Reilly, Adam Scott, Mary Steenburgen, Richard Jenkins og fleiri.
Framleiðendur hafa sent frá sér stutta lýsingu á efni myndarinnar, en hafa ekki gefið frekari upplýsingar: Stjúpbræðurnir eru núna fluttir til Lynwood í Kaliforníu, þar sem þeir bæði búa saman og vinna saman, á sama lítilmótlega vinnustaðnum og áður.
Dale kemst að því að honum hefur einhvernveginn tekist að gera „kærustu“ sína ófríska, en þegar unga konan skilur barnið eftir hjá þeim Dale og Brennan, þá neyðast þeir til að ala það upp sjálfir.
Byrjað verður að ráða í aukahlutverk nú fyrir áramót.
