Kiefer Sutherland mun snúa aftur í hlutverki sínu sem Jack Bauer í sjónvarpsþáttunum 24 á Fox sjónvarpsstöðinni bandarísku næsta vetur.
Upphaflegu þættirnir voru 192 að tölu og voru í sýningum frá árinu 2001 – 2010. Auk þess sem sjónvarpsmynd var gerð.
Um er að ræða seríu sem mun takmarkast við 12 þætti og mun heita 24: Live Another Day.
„24 þjappað saman í 12 vikur, Jack er kominn aftur,“ sagði Kevin Reilly hjá Fox við fréttamenn fyrr í dag.
Fyrir um ári síðan var hætt við gerð kvikmyndar eftir sjónvarpsþáttunum, og ættu aðdáendur því nú að geta tekið gleði sína á ný.
„Ég sakna persónunnar mjög, og ég veit að Kiefer gerir það sömuleiðis,“ bætti Reilly við.
Hann sagði einnig að hugsanlega myndu þættirnir gerast utan Bandaríkjanna að einhverju leyti, og yrðu mögulega ekki takmarkaðir við 24 klukkutíma eins og hingað til hefur verið.