Runner Runner (2013)

Þegar námsmaðurinn Richie Furst tapar öllu í netpóker fær hann grun um að svindlað hafi verið á honum og ákveður að hitta eiganda pókersíðunnar augliti til auglitis. Justin Timberlake leikur hér stærðfræðiséníið Richie Furst sem hefur hug á að stunda nám við Princeton-háskóla en hefur ekki efni á því. Til að freista þess að fjármagna námið hefur hann að undanförnu spilað póker á netinu og orðið nokkuð ágengt. En lukkan snýr við honum bakinu eins og hendi væri veifað þegar hann tapar öllu í spili sem hann telur að hann hefði átt að vinna. Um leið fer hann að gruna að tapið hafi ekki verið nein tilviljun heldur hafi verið svindlað á honum. Til að komast að hinu sanna ákveður Richie að fara til Kosta Ríka og hitta manninn sem stendur á bak við netpókersíðuna. Sá heitir Ivan Block (Ben Affleck) og reynist sannarlega vera úlfur í sauðargæru. Þegar alríkislögreglan blandast í málið áttar Richie sig á því að hann er kominn á milli steins og sleggju og ef hann ætlar að lifa af þarf hann að koma með krók á móti bragði ...