Changing Lanes (2002)

Ég ætla ekki að fjölyrða mikið um þessa mynd. Leit yfir úrvalið og þessi varð fyrir valinu. Kom inn með engar væntingar í garð myndarinnar og grófa hugmynd um hvað hún fjallaði og fór mjög sáttur út.

Myndin kemur þægilega á óvart, miðað við að verið er að horfa á bandaríska kvikmyndagerð.

Dregin er upp raunsæ mynd af tveimur mönnum, sem eru á sitthvorum pólnum í lífinu og leið þeirra látin skerast.

Leikurinn hjá þeim Affleck og Jackson er virkilega góður og persónusköpun öll til fyrirmyndar. Siðferðislegar spurningar skjóta upp kollinum sem að dregur áhorfandann meira inn í myndina, (hvað myndi ég gera í þessum sporum?).

Fyrir þá sem eru orðnir þreyttir á að láta mata ofan í sig kvikmyndir, þá mæli ég með þessari.

Fyrir aðra þá mæli ég með James Bond. Maður veit þar hvað maður fær og í hvaða röð ;)

Hér er um að ræða óhefðbundna kvikmynd sem erfitt er að flokka, en hlýtur þó helst að teljast drama frekar en nokkuð annað. Tveir ólíkir New York búar, Gavin (Ben Affleck) sem er ríkur ungur lögfræðingur og Doyle (Samuel Jackson) sem er óvirkur áfengissjúklingur að reyna að bjarga fjölskyldu sinni, lenda í árekstri á hraðbraut. Báðir eru á mikilli hraðferð og hefur hvorugur efni á því að vera seinn á áfangastað sinn, en Gavin kýs að rjúka af stað án þess að ganga rétt frá málunum og skilur Doyle eftir með bilaðan bíl sem veldur því að hann kemst ekki í réttarsalinn þegar ákvörðun er tekin um forræða sona hans tveggja. Þessi tilviljunarkenndi árekstur hrindir af stað atburðarás sem reynist örlagarík fyrir báða aðila. Hvorugur þeirra er góður eða vondur, þetta eru bara tveir menn sem að eru reknir á ystu nöf. Hér er að mestu leiti farið fínt í að velta upp spurningum um hvernig einstaklingur þarf að haga sér sem hluti af samfélagi ásamt fleiri spurningum sem varða réttlæti og heiður. Affleck og Jackson standa sig vel í aðalhlutverkunum og einnig má finna sterkar frammistöður aukaleikara á borð við Tony Colette og William Hurt. Að öllu jöfnu væri hér um að ræða meðalmynd, en það er eitthvað við ferskleikann í atburðarásinni ásamt því hversu óútreiknanleg og óskilgreinanleg hún er sem lyfir myndinni upp á hærra plan. Hollywood sendir ekki oft frá sér myndir sem þessa. Mitt mat er því að Changing Lanes er áhugaverð kvikmynd sem hefur gott afþreyingargildi og fær mann jafnvel til að hugsa um hlutina í víðara samhengi. Ég skelli því á hana þremur stjörnum og vona að við sjáum meira af þessum ferskleika í næstu myndum leikstjórans Roger Michells.

Þetta er í rauninni eins mikil jaðarmynd og mainstream Hollywood mynd getur orðið. Hún er vel leikin af þeim Samuel L. Jackson sem gæti ekki leikið illa þó hann reyndi, og Ben Affleck sem mér finnst alltaf vera vanmetinn leikari. Einnig sýnir Amanda Peet alveg frábæran leik í litlu hlutverki í myndinni, og eignar hún sér alveg þau atriði sem hún er í. Plottið í myndinni er frekar sniðugt og frumlegt. Það er líka ágætlega spilað úr því, þó reyndar myndin detti niður í venjulega Hollywood klisju alveg í endann. Það breytir því ekki að mestallan tímann erum við með í höndunum vel unna og skemmtilega flækju sem þessir tveir menn festa sjálfa sig í. Tæknilega er myndin vel unnin, og það vantar aðeins einhvern neista sem hefði kveikt almennilega í myndinni. Hún er alltaf á góðu róli, en aldrei á neinu háu flugi. Ef hún hefði þorað að ganga aðeins lengra, og sleppa meira fram af sér beislinu ásamt því að sleppa Hollywood endinum, hefðum við getað endað uppi með frábæra mynd. Í staðinn erum við með mynd töluvert yfir meðallagi og vel þess virði að kíkja á.

Changing Lanes er afskaplega óvenjulegur "þriller," því sem slíkur gefur hún skít í allar hefðbundnu formúlur. Í stað þess að treysta sig á hasar og spennuuppbyggingu þá sér leikstjórinn til þess að leggja mestu áhersluna á raunveruleikann og þar á meðal hafa persónusköpunina í lykilhlutverkinu. Aðall myndarinnar er þó leikurinn. Samuel L. Jackson og Ben Affleck koma verulega sterkir inn í hlutverkum sínum, og jafnframt sýnir Affleck albestu frammistöðu feril síns að mínu mati. Síðan gerist það varla betra þegar aukaleikhópurinn er nánast bara umvafinn gæðaleikurum (sem eru m.a. Sydney Pollack, Dylan Baker, William Hurt, Richard Jenkins og Toni Collette). Tónlistin í myndinni virkar einnig þónokkuð vel og smellpassar við allt andrúmsloftið, og kvikmyndatakan er oft á tíðum glæsileg. Handritið er líka gífurlega traust og söguþráðurinn er áhugaverður, frumlegur á vissan hátt og heldur athygli manns alveg út í gegn, og ef endirinn væri ekki svona fyrirsjáanlegur og hefði ekki skilið svona marga plottpunkta eftir opna, þá væri myndin á góðri leið með að teljast með þeim betri á árinu. En fyrst svo er ekki þá verður bara að hafa gott með heildina eins og hún er. Þetta er bara einhver athyglisverðasti dramaþriller sem ég hef séð í dágóðan tíma, og þar af leiðandi á ég mjög erfitt með að mæla ekki með henni.7/10

Changing Lanes er raunsæismynd og það ótrúlega góð, mjög vel leikin og flott myndataka sem fær mann til þess að vera meiri þáttakandi í atburðarrásini.

Myndin er um tvo menn, annars vegar þennan venjulega mann sem gengur að vísu á AA fundi vegna þess að hann er háður því að lenda í hremmingum, hann stendur í forræðisdeilu við eiginkonu sína en þó aðallega til þess að hún flytji ekki yfir í aðra borg. Hinsvegar er það lögfræðingurinn ungi og forríki sem hefur ekki þurft að hafa áhyggjur fyrr en þennan örlagaríka dag þegar að þessir tveir menn síðan hittast.

Samuel L.Jackson bregst ekki bogalistin frekar en fyrri daginn og sýnir alveg ótrúlega leikhæfileika, Ben Affleck sýnir líka mjög góðan leik og hefur unnið sér inn aukið álit hjá mér.

Myndin fær mann til þess að vorkenna báðum aðilum þó sérstaklega Jackson sem traðkað er yfir á skítugum skónum.

Þetta er mynd sem að ég mæli eindregið með fyrir fólk sem er ekki að leita að einhverjum hasar heldur vill sjá skemtilega og raunsæja fléttu með góðum leikurum.

Í byrjun kvikmyndarinnar Changing Lanes eru þeir Gavin Banek (Ben Affleck) og Doyle Gipson (Samuel L. Jackson) á leiðinni í réttarsalinn. Gavin er með nokkur gögn með sér sem hann þarf að sýna fyrir rétti en Doyle reynir að fá yfirráð yfir sonum sínum. Þeir tveir lenda svo í umferðarslysi og bílinn hans Doyle eyðileggst Gavin má samt ekkert vera að því að hjálpa honum að koma á réttum tíma í réttarsalinn svo Doyle kemur of seint og tapar málinu. En hann er ekki einn um að vera í vondum málum því hann hefur eitt af gögnunum sem Gavin átti að sýna fyrir rétti. Hæstaréttardómarinn gefur honum frest þangað til í lok dagsins til að koma með gögnin. En hann getur aðeins látið sig dreyma því Doyle er mjög reiður út í hann vagna þess að hann kom of seint í réttinn. Gavin reynir að grípa til allra örþrifaráða en Doyle er einfaldlega allt of reiður út í hann en Gavin gæti jafnvel lent í fangelsi ef hann fær ekki gögnin.


Changing Lanes gerist á einum viðburðarríkum degi í lífi þeirra Gavin og Doyle. Mér hefur alltaf fundist Ben Affleck vera hræðilegur leikari en hann var betri í þessari mynd heldur en ég hafði búist við, samt ekki nógu góður. Samuel L. Jackson stendur sig samt alveg ágætlega. Roger Michell, leikstjóri myndarinnar ætti að vera þekktastur fyrir að hafa leikstýrt Notting Hill en aðrar myndir eftir hann eru Titanic Town, My Night with Reg og Persuasion. Changing Lanes er mjög alvarleg og dramtísk kvikmynd en hún er jafnframt spennandi allan tímann þó það hafi verið ósköp lítið um hasar. Myndin verður nokkuð langdregin í lokin og endirinn er fyrirsjáanlegur. Það besta við handritið af myndinni er góð persónusköpun sem er alls ekki til staðar í öllum myndum. Changing Lanes er í heildina litið yfir meðallagi, hún er alveg þess virði að horfa á en samt engin snilldar mynd.

Changing lanes er um vel leikin mynd enda ekki við öðru að búast frá Samuel L Jackson og Ben Affleck. Söguþráðurinn er góður en lítið er um hasar og klám. Jackson er að reyna að fá forræði yfir sonum sínum. Affleck leikur lögfræðing sem er á leiðinni í dómsalinn og þessir tveir menn lenda í árekstri. Jackson fær óvart sönnunargagn sem Affleck þarf og þannig hefst atburðasásin. Jackson mætir of seint í réttarsalinn á fær því ekki forræði yfir sonum sínum. Myndin gerist á einum degi. og elda þeir grátt silfur saman Jackson reynir t.d. að drepa Affleck. Og í heildina er þetta ágætis mynd en þó vantar aðeins meiri hasar. Og gef ég henni tvær og hálfa stjörnu.