Cats and Dogs (2001)

Þessi mynd er hreint út sagt vonbrigði ! Ég sá trailerinn og vá, ég varð mjög spenntur þar sem þetta sýndist hin skemmtilegasta mynd, en nei og aftur nei. Þessi atriði sem maður sá í trailernum eru þau einu góðu, því miður. Svo er allt of ofaukið, eins og hundakofinn. Þessi mynd er alveg ömurleg í alla staði en gæti kanski fengið þá sem ekki er búnir að sjá trailerinn til að brosa en annað ekki :(

Það verður nú að segjast eins og er að ég varð fyrir töluverðum vonbrigðum með þessa mynd. Trailerinn var með þeim fyndnari sem maður hefur séð í seinni tíð, en því miður voru öll fyndnu atriðin í honum. Í raun var myndin alveg ágæt meðan einblínt var á stríðið milli katta og hunda, en þegar skipt var yfir til mannanna dó myndin alveg drottni sínum. Jeff Goldblum var alveg úti að aka, og krakkinn sem lék eiganda hundsins var hræðilegur. Ég hef ekki séð meira óþolandi krakka í kvikmynd síðan McCauley Caulkin var og hét og langaði mann til þess að kyrkja krakkann með berum höndum eftir að hafa séð hann einusinni, hvað þá í 90 mínútur. Aftur á móti fer gaurinn sem talar fyrir vonda aðalköttinn ( homminn, vinur hommans úr Will & Grace (hmmmm) ) alveg á kostum. Hann á hvern snilldarbrandarann á fætur öðrum, en allt kemur fyrir ekki. Myndin er hreinlega slöpp og merkilega illa gerð miðað við hvað hún var dýr í framleiðslu. Því miður er ekki hægt að mæla með þessari mynd fyrir neinn sem er orðinn eldri en 8 ára.

Áður en ég fór á Cats and Dogs bjóst ég við mynd í alveg sama stíl og Babe. En það kom mér á óvart að sum atriðin voru algjörlega tölvugerð (eins og atriðið með mýsnar). En ég get nú ekki sagt að þessi mynd sé mjög góð en það voru fyndnir fimm aura brandarar í henni og hún var nokkuð skemmtileg í heild. Myndin er annars um talandi hunda og ketti sem eru miklir óvinir og etja nokkurs konar tæknilegt stríð sín á milli.

Cats and Dogs er nokkuð skemmtileg mynd. Það er vel hægt að hlæja að henni. Þar er Mr. Tinkles (Sean Hayes í Will & Grace)í fararbroddi sem fyndnasta persónan, að mínu mati. Hugmyndin á bak við myndina er skemmtileg og tæknibrellurnar eru flottar. Allir leikarar sem töluðu inn á myndina stóðu sig ágætlega en Sean Hayes var þó bestur. Þetta er mynd sem allir geta haft gaman að, þó svo þetta sé barna- og fjölskyldumynd. Myndin fær þó stóran mínus hjá mér fyrir endinn, sem er svo amerískur að ég fékk hreinlega æluna upp í kok. Annars mæli ég með myndinni sem góðri skemmtun.

Hreint og beint frábær mynd með skemmtilegum persónum eins og Bárður (Lou) og Rússinn, svo voru ninjurnar líka skemmtilegar en þar sem hundarnir eru góðu gæjarnir get ég ekki gefið myndinni þrár stjörnur (sem kattavinur segi ég að kettirnir ættu að vera góðu gæarnir) en ég vona að þið getið skemmt ikkur við að horfa á myndina.

Hvað er þetta með Hollywood og lélegar fjölskyldumyndir? Cats and Dogs er mynd sem ætti að vera frábær - hugmyndin er ekkert minna en stórkostleg - en er því miður í nær alla staði undir meðallagi. Myndin segir frá stríði hunda og katta þar sem, auðvitað, kettirnir eru klækjóttir og vondir en hundarnir klaufalegir og góðir. Ég ætla að láta það vera að fara út í katt-og hundisma eins og amerískir gagnrýnendur gerðu fyrir nokkrum vikum, en persónulega fannst mér kettirnir mun skemmtilegri karakterar. Ja, þ. E. a. S. einn köttur var skemmtilegur karakter og ég tel að það sé eingöngu vegna þess að hinn frábærlega fyndni Sean Hayes talaði fyrir þá persónu, Mr. Tinkles, og á bókstaflega alla brandara myndarinnar (meðal annars einn sem er svo góður að hann er næstum því 800 króna virði einn og sér. Næstum því). Eins og venjan er með bandarískar myndir sem innihalda dýr þá má líka finna stereótýpískt mannfólk: Jeff Goldblum leikur vísindamann sem er allt of upptekinn við starf sitt til að geta mætt á fótboltaæfingar sonar síns og er strákurinn alltaf í fýlu yfir þessari vanrækslu (hvað höfum við séð þetta oft?!). Tobey Maguire, Susan Sarandon, Alec Baldwin, Michael Clarke Duncan, Jon Lovitz og Joe Pantoliano tala ásamt Hayes fyrir dýrin og standa sig ágætlega, þó ég leyfi mér að efast um það að þau hafi lesið handritið áður en þau sögðu já. Þetta er samt sem áður fjölskyldumynd og þar af leiðandi fyrir börn (ég er reyndar algjörlega ósammála þessu, en ég hef útskýrt það á þessari síðu oft áður og nenni því ekki núna) og væri hægt að fyrirgefa myndinni lélegt og klisjukennt handrit ef hún væri eitthvað skemmtileg. En, nei: Cats and Dogs er einfaldlega hund-(og katt-)leiðinleg!

Þessi mynd fjallar um eins nafnið á henni segir um hunda og ketti, þegar ég fór hana í bío þá vissi ég ekki við hverju ég átti að búast en hún kom mér skemmtilega á óvart bæði hvað varðar skemmtanaleika og tæknibrellurnar, Jeff Goldblum er góður sem pabbinn og Jon Lovits fer á kostum sem einn kötturinn, ég verð að segja að þessi mynd er fyrir alla aldurshópa og mæli ég eindregið með henni!

Ég verð að segja að sjáldan séð jafn lélega mynd eins og þessa, þvílík vonbrigði. Þetta var í fyrsta skipti sem ég hef farið í hléi. En fyrir þá sem vantar barnamynd í afmæli eða þess háttar gætu væntanlega sloppið með þessa mynd. Myndin ætti hreinlega að vera bönnuð fólki eldra en 10 ára.

Cats & Dogs hefði getað orðið að frábærri skemmtun hefði stúdíóið ráðið betri handritshöfunda og bara haldið fókusnum á "stríðið" og sleppt allri amerísku "pabbi-minn-er-alltaf-upptekinn" formúlunni. Ekki bara höfum við séð slíkt alltof oft, heldur voru mennsku leikararnir í myndinni bara grútleiðinlegir.Ég er á þeirri skoðun að krakkar geti haft gaman að hverju sem er, og því þarf ekki að gera mikið til að búa til mynd sem virkar sem góð barnapía. Það er kröfuharðara að búa til almennilega fjölskyldumynd þar sem fólk af bókstaflega öllum aldri finnur sér eitthvað við hæfi. Cats & Dogs er svo sannarlega ekki þannig mynd. Hún er bara barnaleg og ekkert meira. Brellurnar eru á sumum stöðum góðar, en stundum teiknimyndalegar og óvandaðar. Raddirnar gerðu heldur ekki mikið og það er svekkjandi þegar maður rennur yfir leikaralistann.Enn eitt skiptið hefur Hollywood tekið stórfína hugmynd og breytt henni í formúlukennt, húmorslaust bull sem skilur lítið gott eftir sig. Ég segi það með stolti að ég muni aldrei nenna að horfa á þessa mynd aftur.3/10 - P.S. Ég hélt með köttunum.