Bulworth (1998)

Einhver skemmtilegasta ádeilumynd sem undirritaður hefur augum barið. Warren Beatty stórgóður í aðalhlutverkinu - og leikstjórastólnum, þá sjaldan - sem þingmaður sem einn daginn hættir að nenna þessu, ræður leigumorðingja til að drepa sig, fer að reykja gras og segja sannleikann og jafnvel rappa ef svo ber undir.

Bráðskemmtileg og skila leikarar sínu vel, allir sem einn, enda persónur feykiskemmtilega skrifaðar.

Þessi kvikmynd leikarans og óskarsverðlaunaleikstjórans Warren Beatty (hefur leikið í stórmyndum á borð við Bonnie og Clyde, Heaven Can Wait, Shampoo, Bugsy og Reds en hann hlaut jafnframt leikstjóraóskarinn fyrir það stórfenglega meistaraverk 1981) hefur hlotið nánast einróma lof gagnrýnenda beggja vegna Atlantshafsins og þykir mér hún sérlega vel leikin og skrifuð, fyndin og afar skemmtileg. Með aðalhlutverkin auk Beatty fer hópur úrvalsleikara, m.a. má nefna þau Halle Berry, Don Cheadle, Oliver Platt, Paul Sorvino og Jack Warden. Þess ber einnig að geta að myndin var tilnefnd bæði til Óskars- og Golden Globe-verðlauna fyrir besta handrit ársins 1998 auk þess sem Beatty var tilnefndur til Golden Globe-verðlauna fyrir besta leik ársins 1998 í aðalhlutverki. Öldungadeildarþingmaðurinn Jay Bulworth (Beatty) sem keppir að því að verða ríkisstjóri í fylki sínu er búinn að fá sig fullsaddan af hrossakaupum, lygum og svikum kollega sinna og er viss um að stjórnmálaferill hans sjálfs sé á enda. Hann ákveður því að grípa til þess einkennilega ráðs að líftryggja sig fyrir svimandi upphæð og ráða svo leigumorðingja til að taka sig af lífi. Í fyrstu er hann sáttur við ákvörðun sína en tekur um leið að finna hjá sér þörf til að tjá fólki sína raunverulegu afstöðu í pólitík. Og vegna þess að hann á hvort sem er von á sínum eigin dauða innan skamms lætur hann allt flakka sem honum dettur í hug og hikar ekki við að segja sannleikann um menn og málefni. Þetta leiðir hins vegar til þess að brátt er Bulworth orðinn einn vinsælasti stjórnmálamaður Bandaríkjanna og þegar hann verður í ofanálag ástfanginn af róttæklingnum Ninu finnur hann loksins einhvern tilgang í lífi sínu. Spurningin er bara hvort sú uppgötvun komi ekki of seint! Þetta er mynd sem fáir kvikmyndaunnendur verða fyrir vonbrigðum með og ég mæli hreint eindregið með henni um leið og ég gef henni þrjár og hálfa stjörnu í einkunn