Spennu-gamanmyndin Rest In Peace Department, eða R.I.P.D, með þeim Ryan Reynolds og Jeff Bridges í hlutverkum einskonar yfirnáttúrulegra lögguengla, verður frumsýnd í Bandaríkjunum um næstu helgi og hér á landi í næstu viku.
Von er á fleiri svipuðum myndum frá Hollywood á næstunni, en myndin Solace, með þeim Anthony Hopkins, Colin Farrell og fleiri góðum kemur í bíó á næsta ári.
Fyrsta ljósmyndin hefur verið birt úr Solace og má sjá hana hér fyrir neðan:
Hopkins leikur í myndinni greinanda hjá lögreglunni sem er kominn á eftirlaun, en ákveður að taka lögguhúfuna niður af hillunni og leysa eitt mál til viðbótar ásamt lögreglumanni sem leikinn er af Jeffrey Dean Morgan. Þeir þurfa, ásamt persónu sem leikin er af Abbie Cornish, að leysa flókna morðgátu sem þorpari leikinn af Colin Farrell leggur fyrir þau, en Farrell býr yfir yfirnáttúrulegum hæfileikum.
Afonso Poyart leikstýrir. Stefnt er að frumsýningu á næsta ári.