Ljósbrot Rúnars Rúnarssonar rauk beint í efsta sæti íslenska aðsóknarlista kvikmyndahúsa um helgina og hafa nú rúmlega 2.500 manns séð myndina. Spennumyndin Alien: Romulus er komin niður um eitt sæti og trónir núna með trompi í öðru sæti aðsóknarlistans.
Ljósbrot var í vor opnunarmynd kvikmyndahátíðarinnar í Cannes og hlaut þar góðar viðtökur áhorfenda og gagnrýnenda. The Hollywood Reporter og ScreenDaily völdu Ljósbrot meðal bestu myndanna á Cannes hátíðinni í ár. Einnig vann myndin til fernra alþjóðlegra kvikmyndaverðlauna í sumar og er í forvali til Evrópsku kvikmyndaverðlaunanna.
Ljósbrot gerist á fallegum vordegi þegar líf Unu snýst á hliðina á svipstundu og upphefst rússíbanareið tilfinninga þar sem mörkin milli hláturs og gráts, fegurðar og sorgar, verða stundum óskýr.
Með aðalhlutverk í myndinni fara Elín Hall, Katla Njálsdóttir, Mikael Kaaber, Baldur Einarsson, Gunnar Kristjánsson og Ágúst Wigum. Heather Millard hjá Compass Films framleiðir myndina ásamt Rúnari. Meðframleiðslufyrirtæki eru hið íslenska Halibut, hið hollenska Revolver, franska Eaux Vives/Jour2Fête og króatíska fyrirtækið MP Film.
Kvikmyndirnar Bjargvættur Skógarins og Strange Darling voru einnig frumsýndar um helgina og komu sér vel fyrir í áttuna og tíunda sæti listans.
Heildaraðsókn kvikmyndahúsa fyrir helgina er að finna hér að neðan.
