Á Alþjóðlegri kvikmyndahátíð í Reykjavík, RIFF, sem hefst þann 22. september nk. verður sérstakur tónlistarmyndaflokkur eins og undanfarin ár. Hann inniheldur bæði leiknar myndir og heimildamyndir, sem með einhverjum hætti tengjast tónlist sérstaklega.
Átta myndir munu verða sýndar í þessum flokki, en þegar hefur verið sagt frá myndunum The Miners’ Hymns eftir Bill Morrison með tónlist eftir Jóhann Jóhannsson, og tólf stuttmyndum við jafnmörg lög af nýrri plötu PJ Harvey, Let England Shake.
Aðrar myndir sem verða sýndar í tónlistarmyndaflokki hátíðarinnar í ár eru eftirfarandi:
Scenes from the Suburbs eftir Spike Jonze:
Stuttmynd sem fylgir eftir innihaldi plötunnar The Suburbs eftir Arcade Fire, en handritið er skrifað af hljómsveitarmeðlimum og Jonze.
Sing Your Song eftir Susanne Rostock:
Segir frá lífshlaupi söngvarans, leikarans og mannréttindafrömuðarins Harry Belafonte.
LENNONYC eftir Michael Epstein:
Í myndinni er fjallað um ár John Lennon í New York.
In the Garden of Sounds eftir Nicola Bellucci:
Óvenjuleg heimildamynd um Wolfgang Fasser, blindan tón- og hljóðlistamann sem vinnur með fötluðum börnum.
Mrs. Carey’s Concert eftir Bob Connolly og Sophie Raymond:
Fylgst með tónlistarstjóra stúlknaskóla í Sydney leiða unga flytjendur skólatónleika óperuhússins fræga í átt að fullkomnun.
Beats, Rhymes & Life: The Travels of A Tribe Called Quest eftir Michael Rapaport:
Heimildamynd um eina áhrifamestu hip-hop hljómsveit allra tíma.
