Leikstjórinn Jón E. Gústafsson er gestur í nýjasta þætti af The Drop-In hjá Reykjavík Grapevine, þar sem hann fer yfir feril sem spannar tónlist, sjónvarp, heimildarmyndagerð og nýjustu kvikmynd sína Anorgasmia: All the Things We Do To Survive.
Anorgasmia er nú í Bíó Paradís. Í þættinum lýsir Jón myndinni sem sögu um kynslóð sem eigi erfitt með að skuldbinda sig. Hann segir persónurnar settar upp á íslenska hálendið, þar sem þær geti ekki einfaldlega „swipe-að til vinstri“ til að losna hver við aðra.
Hann segist í viðtalinu hafa átt erfitt með að finna rétta tónskáldið fyrir kvikmyndina, eða þar til eiginkona hans benti honum á tónlistina í The Perks of Being a Wallflower. Hann sendi myndina í kjölfarið til kanadíska tónskáldsins Michael Brook, sem samdi tónlistina við þá kvikmynd og fékk svar tveimur vikum síðar: Brook líkaði myndin og vildi semja tónlistina.
Í vinnunni með Brook komst Jón að því að hann hafði fundið upp svokallað Infinite Guitar, hljóðfæri þar sem tónn getur haldist óslitinn. Jón segir Brook hafa sýnt U2 hljóðfærið í gegnum Daniel Lanois og að gítarleikari U2, The Edge, hafi fallið fyrir því.
Jón rifjar upp í viðtalinu að hann hafi tekið við upptökum með Bubba Morthens þegar annar upptökumaður mætti seint og Bubbi var orðinn pirraður. Upptökurnar byrjuðu sem demó en þróuðust síðar yfir í plötuna Kona.
Leikstjórinn segir einnig frá því þegar hann fékk hljómsveitina KUKL í sjónvarpsþátt sinn á RÚV. Björk var þá ólétt og flutningurinn olli miklu fjaðrafoki; Jón segist hafa verið kallaður á teppið og næstum misst starfið.
Jón kemur líka inn á upphaf Gettu betur spurningakeppni framhaldsskólanna. Hann segir hugmyndina hafa komið frá tveimur framhaldsskólanemum, en að hann hafi byggt upp sjónvarpsformið meðal annars með innblæstri frá bresku spurningaþáttunum Mastermind. Hann segist hafa þurft að kenna áhorfendum í salnum að haga sér meira eins og á íþróttaleik, hvetja sitt lið og losa aðeins um formlegheitin.
Þá er rætt um heimildarmyndina Wrath of the Gods, sem fjallaði um erfiða framleiðslu Beowulf & Grendel með Gerard Butler, og um tengsl Jóns við Gimli í Kanada og upphaf Gimli Film Festival.
Heimild: The Drop-In #19 hjá Reykjavík Grapevine.
