Sena ætlar að bjóða landsmönnum upp á sérstaka jólasýningu á kvikmyndinni Once Upon a Deadpool nú síðar í vikunni. Verður myndin aðeins sýnd 12., 13. og 14. desember eða nánar tiltekið: miðvikudaginn 12. desember í Borgarbíói á Akureyri, fimmtudaginn 13.desember í Smárabíói og föstudaginn 14.desember í Háskólabíó.
Eins og segir í tilkynningu frá Senu er Once Upon a Deadpool glæný útgáfa af hinni stórvinsælu Deadpool 2 þar sem búið er að „mixa“ myndina upp á nýtt í sannkölluðum Deadpool-stíl.
„Málaliðinn Wade Wilson er, eins og kunnugt er, andhetja með hjarta úr gulli. Hins vegar hefur hann lengi átt við vandamál að stríða í tengslum við vægðarlausar aðferðir sínar og orðbragð, en í tilefni jólanna og með tillit til yngri áhorfenda lofar hann að vera stilltur í kringum hátíðirnar.“
Þá segir í tilkynningunni að Once Upon a Deadpool sé hlaðin nýjum senum og bröndurum sem ættu að hitta í mark hjá aðdáendum kappans, eins og það er orðað í tilkynningu Senu. Í myndinni segir Wade söguna af því þegar hann berst við tímaflakkarann Cable og kallar til leiks fleiri ofurhetjur með samtakamætti sínum.
