Kvikmyndafyrirtækið Warner Bros Pictures tilkynnti fyrr á árinu að bandaríski leikarinn Jesse Eisenberg væri ráðinn í hlutverk Lex Luthor, aðal illmennisins í Superman v Batman: Dawn of Justice.
Fyrsta myndin af Eisenberg í hlutverki Luthor var opinberuð í dag og má sjá hana hér til vinstri. Eisenberg var myndaður á rölti um tökustað myndarinnar og þykir mörgum hann frekar hárprúður í hlutverki sínu, en Lex Luthor er þekktur fyrir að vera sköllóttur, þó það séu til undantekningar í myndasögum þar sem hann hefur hár á höfði.
Zack Snyder leikstjóri myndarinnar sagði í tilkynningu fyrr á árinu að Luthor hafi löngum verið talinn illræmdasti óvinur Superman. „Það sem er frábært við Lex er að hann er ekki bara svívirðilegur óþokki heldur er hann margbrotin persóna og fágaður karakter, en gáfur hans, auður og staða hans gera hann einn af fáum dauðlegum mönnum til að geta ögrað hinum ógnarsterka Superman.“
Lex Luthor er lýst sem ótrulega gáfuðum einstakling, sem á sér það eina takmark að eyða Superman. Hann hefur notað Kryptonite, ferðast um tímann, náð í verur í fjórðu vídd og fengið hjálp frá öðrum óvinum Superman. Þrátt fyrir allar sínar tilraunir þá hefur Superman alltaf borið sigur úr býtum en alltaf tekst Lex að sleppa annaðhvort úr höndum Supermans eða úr fangelsi.
