Hafmeyjurnar eru djöflarnir

„Landkrabbar eins og ég og þú höfum alltaf haft rangt fyrir okkur: Kraken eru ekki hræðileg sæskrímsli sem eyðileggja bátana okkar og borða sjómennina. Þau eru ljúf og hjálpsöm. Það eru hafmeyjarnar sem eru hinir raunverulegu djöflar,“ þannig byrjar grein um Ruby Gillman: Táningssæskrímslið (e. Ruby Gillman, Teenage Kraken) á vefsíðu AP news.

Myndin kom í bíó hér á Íslandi um helgina.

Þar segir einnig að myndin, sem er framleidd af DreamWorks Animation, sé saga um systralag sem nær yfir kynslóðir og skilaboðin séu þau að vera góð hvort við annað og tala saman. ( Já, og svo er í lagi að láta hafmeyjurnar finna verulega fyrir því).

Myndin hverfist um aðalsögupersónuna Ruby Gillman, sem er ungt Kraken sæskrímsli sem býr meðal manna í bænum Oceanside. Hún er blá að lit, með fjóra pulsulaga fingur á hvorri hendi.

En hin 15 ára gamla Ruby, sem Landa Condor talar fyrir í enskri útgáfu myndarinnar, er ósátt við mömmu sína sem Toni Collette talar fyrir, þegar rætt er um lokaballið. Nú á að halda það á partýskipi og ef vatn skvettist á Ruby þá mun hún breytast í risastórt glitrandi Kraken sæskrímsli. Mamma segir að hún megi ekki fara á ballið þó Ruby þráspyrji hana, en svo virðist sem sæskrímslaforeldrar séu ekki ólíkir öðrum foreldrum.

Af aðalsættum

En lokaballið verður fljótlega ekki aðal áhyggjuefni Ruby eða eftir að hún kynnist raunverulegum ættmennum sínum og kemst að því að hún er af aðalsfjölskyldu og ein sú síðasta af sinni tegund.

Harðsnúin amma hennar sem Jane Fonda talar fyrir, hvetur hana til að kveðja mannheima og taka við krúnunni sem réttilega tilheyrir henni. „Þú getur aldrei synt burt frá örlögunum,“ segir hún.

Ruby, sem elskar rúllukragaboli, en hefur ekkert nef, er í mikilli togstreytu. Á hún að velja mennina og strákinn sem hún er skotin í, eilítið skrítna vini sína og samfélagsmiðla – eða á hún að fylgja örlögunum og takast á hendur verkefnið og völdin sem henni eru gefin.

„Að vera í sjónum er betra en ég hefði nokkurn tímann getað hugsað mér,“ segir hún þegar hún syndir fimlega í sjónum, risastór og glóandi.

Líkist tveimur myndum

AP news segir að myndin líkist að mörgu leiti teiknimyndinni Turning Red sem frumsýnd var á síðasta ári, sem er einnig uppvaxtarsaga stúlku sem kynnist forsögu sinni og huldum hæfileikum.

Þá má sjá líkindi með Luca, teiknimynd sem gerist á Ítalíu um tvö ung sæskrímsli sem skoða mannheima sem menn.

AP News gefur Ruby Gillman tvær og hálfa stjörnu af fjórum mögulegum.

En sjón er sögu ríkari. Kíktu á stikluna hér að neðan og farðu svo og sjáðu myndina á hvíta tjaldinu!