Kvikmyndin The Orphanage, eða Munaðarleysingjaheimilið, sem er eftir hina 29 ára gömlu Shahrbanoo Sadat frá Afghanistan, vann aðalverðlaun RIFF, Alþjóðlegrar kvikmyndahátíðar í Reykjavík í gærkvöldi, Gullna lundann.
Verðlaunahátíðin fór fram í Norræna húsinu í sextánda skiptið. Hátíðinni er nú formlega lokið, en verðlaunamyndir og vinsælustu myndir hátíðarinnar verða sýndar í dag sunnudag.
Það var Katja Adomeit framleiðandi Munaðarleysingjahælisins sem tók við verðlaununum.
Söguþráður kvikmyndarinnar er eftirfarandi: Á seinni hluta níunda áratugarins býr hinn fimmtán ára Qodrat á götum Kabúls og selur bíómiða á svörtum markaði. Hann er mikill aðdáandi Bollywood mynda og lifir sig sterkt inn í uppáhalds atriðin úr myndunum. Dag einn fer lögreglan með hann á sovéska munaðarleysingjahælið. En stjórnmálaástandið er að breytast í Kabúl. Qodrat og öll börnin vilja verja heimili sitt.
Hér má sjá stiklu úr myndinni:
Leikkonan Steinunn Ólína Þorsteinsdóttir afhenti verðlaunin og sagði af tilefninu að þrátt fyrir lítil fjárráð tækist kvikmyndagerðarmönnunum að endurskapa litríkan heim Afganistan tíunda áratugarins.
Minnst á Síðasta haustið
Sérstaklega var minnst á myndina Síðasta haustið eftir Yrsu Roca Fannberg. En þetta er í annað skiptið í 16 ára sögu RIFF sem mynd eftir Íslending er samþykkt í keppnina. Fékk hún sérstaka umfjöllun dómnefndar ásamt myndunum Corpus Christi og Maternal.
Í flokknum Önnur framtíð vann myndin Ferðalangur að nóttu. Í flokknum Önnur framtíð er eins og segir í tilkynningu RIFF reynt að sýna áhorfendum það sem er helst á döfinni í heimildarmyndagerð. „Erfiðum spurningum er kastað fram. Getum við haldið í það lífsmynstur sem við erum vön eða er kominn tími til að breyta til? Ræður plánetan við ágang mannsins? Komum við vel fram hvert við annað? Í flokknum Önnur framtíð er að finna áhrifamiklar kvikmyndir um mannréttinda- og umhverfismál. Bíó getur breytt heiminum.“
Um myndina Ferðalangur að nóttu eftir Hassan Fazili segir: Þegar talíbanar setja fé til höfuðs afganska leikstjóranum Hassan Fazili neyðist hann til að flýja ásamt eiginkonu og tveimur dætrum. Fazili fangar frá fyrstu hendi þá hættu sem mætir hælisleitendum og ástina sem ríkir í fjölskyldu á flótta.
Í flokknum Íslenskar stuttmyndir vann myndin Blaðberinn eftir Ninnu Pálmadóttur. Dómnefndin minntist einnig á stuttmyndina Gulrætur eftir Berg Árnason.
Í flokknum Gullna eggið vann myndin Muero Por Volver eftir Javier Marco.
