Nýja teiknimyndin GOAT frá Sony Pictures Animation er fjörug og hjartahlý íþróttamynd fyrir alla fjölskylduna. Hún sameinar húmor, hraða og litríkan myndheim og nýtir dýraheiminn til að segja sígilda sögu um þann sem þarf að sanna sig.
Myndinni er leikstýrt af Tyree Dillihay og fjallar um Will Harris, litla geit sem dreymir um að komast í efstu deild í íþróttinni Roarball. Í þessum heimi ráða „stóru“ dýrin lögum og lofum, en þau smærri fá sjaldan tækifæri. Will lætur það þó ekki stoppa sig.
Kraftmikill myndheimur
Myndin skartar líflegum og kraftmiklum stíl og heldur áfram þeirri sjónrænu nálgun sem Spider Verse myndirnar, teiknimyndirnar sem fjalla um Köngulóarmanninn, gerðu vinsæla. Senurnar eru hraðar og vel útfærðar og halda spennunni uppi. Á sama tíma er lögð áhersla á vináttu, liðsheild og sjálfstraust, og að hafa trú á sjálfum sér þótt aðrir geri það ekki.
Sterk opnun í kvikmyndahúsum
GOAT hefur farið vel af stað í kvikmyndahúsum og náð góðri aðsókn á fyrstu vikum sýninga. Tekjur myndarinnar á frumsýningarhelginni í Bandaríkjunum voru ríflega 27 milljónir dala, eða 3,3 milljarðar íslenskra króna. Þegar þetta er skrifað eru tekjurnar í Bandaríkjunum orðnar um 65 milljónir dala.
Á heimsvísu er tekjurnar komnar yfir 108 milljónir dala. Þetta segir allt um góðar mótttökur áhorfenda sem greinilega elska þessa léttu og orkumiklu sögu en aðsóknin þykir mjög góð fyrir frumsamda teiknimynd.
GOAT er skemmtileg mynd með skýran boðskap og lifandi persónum. Hún segir kunnuglega sögu, en gerir það af krafti og einlægni. Fyrir þá sem hafa gaman af íþróttamyndum og góðri skemmtun er hún örugg tvö stig í körfuna og traust val í bíó fyrir alla fjölskylduna.
Myndin er nú sýnd í Smárabíói, Sambíóunum og Laugarásbíói.
Heimildir:
KOIMOI: GOAT North America Box Office: Sony’s Animated Hit Holds Strong With $64.5M Total
Deadline: Sports Comedy Scores Big Points For A Creature Cast To Remember
