Sextán árum eftir að The Social Network sagði söguna af uppgangi samfélagsmiðilsins Facebook fær myndin nú óvænt framhald. Sony hefur birt fyrsta trailerinn úr The Social Reckoning, nýrri mynd eftir Aaron Sorkin sem fjallar ekki um stofnun samfélagsmiðilsins heldur afleiðingarnar sem fylgdu í kjölfarið.
Í stað þess að fylgja ungum háskólanema að byggja upp tækniveldi beinist myndin að uppljóstrununum sem urðu þekkt sem The Facebook Files árið 2021. Þar komu fram upplýsingar um innri rannsóknir Facebook sem vöktu spurningar um áhrif samfélagsmiðilsins á geðheilsu ungs fólks, útbreiðslu rangra upplýsinga og pólitíska spennu víða um heim.
Í aðalhlutverkum eru Jeremy Strong sem Mark Zuckerberg, Mikey Madison sem fyrrverandi Facebook verkfræðingurinn Frances Haugen og Jeremy Allen White sem blaðamaðurinn Jeff Horwitz hjá The Wall Street Journal.
Frances Haugen vakti heimsathygli þegar hún lak þúsundum skjala frá Facebook til fjölmiðla. Í myndinni fylgjumst við með samstarfi hennar og Horwitz sem leiddi að lokum til einnar stærstu uppljóstrunar um tæknigeirann á síðustu árum.
Aaron Sorkin, sem skrifaði handritið að The Social Network og vann Óskarsverðlaun fyrir það, snýr nú aftur bæði sem handritshöfundur og leikstjóri.
Sorkin hefur sagt að hann hafi lengi viljað snúa aftur að þessum heimi vegna þess að áhrif Facebook hafi snert nær allar hliðar nútímasamfélagsins.
Á meðan The Social Network fjallaði um stofnun Facebook virðist The Social Reckoning fjalla um afleiðingarnar; ábyrgð, áhrif reiknirita og vald tæknirisanna yfir daglegu lífi milljarða manna.
The Social Reckoning er væntanleg í íslensk kvikmyndahús 8. október 2026.
Hér fyrir neðan má sjá fyrsta trailerinn.
Heimildir:
Variety: The Social Reckoning Trailer: Jeremy Strong Is Mark Zuckerberg in Aaron Sorkin’s Social Network Sequel
Deadline: The Social Reckoning Trailer: Aaron Sorkin Returns To The World Of Facebook
Vogue Adria: 16 Years Later, The Social Network Gets a Sequel. Here’s What We Know