Leikararnir Jim Carrey og Jeff Daniel eru mættir aftur í stærstu gamanmynd ársins, Dumb and Dumber To. Myndin verður frumsýnd föstudaginn 14. nóvember og verður til sýningar í Laugarásbíó, Smárabíó, Háskólabíó, Sam-Álfabakka, Borgarbíó Akureyri, Sam-Keflavík, Bíóhöllin Akranesi, Ísafjarðarbíó, Selfossbíó og Króksbíó.
Tuttugu ár eru núna liðin frá því að hinir óborganlegu Lloyd Christmas og Harry Dunn skutu upp kollinum í einni vinsælustu grínmynd síns tíma og nú eru þeir Jim Carrey og Jeff Daniels mættir aftur í hlutverki óaðskiljanlegu vitleysinganna og hafa engu gleymt. Í framhaldinu leggja Lloyd og Harry í enn eitt ferðalagið en leita að þessu sinni í sameiningu að barni nokkru sem gæti að öllum líkindum verið týnda afkvæmi annars þeirra.
Leikstjórar eru þeir bræður Peter og Bobby Farrelly, en Dumb and Dumber var fyrsta mynd þeirra sem leikstjóra. Myndin þénaði meira en 250 milljónir Bandaríkjadala í sýningum um allan heim á sínum tíma.
