Robert Downey Jr. hefur skrifað undir samning um að leika Tony Stark, betur þekktur sem Iron Man, í tveimur Avengers ofurhetjumyndum til viðbótar.
Þetta var tilkynnt á heimasíðu Marvel.com nú fyrir stundu.
The Avengers 2 mun verða frumsýnd 1. maí 2015 en ekki er búið að ákveða frumsýningardag fyrir The Avengers 3.
Tökur á The Avengers 2 hefjast í mars á næsta ári, en leikstjóri og handritshöfundur er Joss Whedon.
Tvær síðustu Marvel myndir sem Downey Jr. hefur leikið í, The Avengers sem var frumsýnd í fyrra, og Iron Man 3 sem frumsýnd var nú í vor, eru báðar á lista yfir fimm tekjuhæstu bíómyndir allra tíma en þær hafa þénað 2,7 milljarða Bandaríkjadala samanlagt.
Samkvæmt Marvel.com eru fleiri fréttir af The Avengers myndunum á leiðinni á næstu vikum.
