Bíó frá Kúbu í fyrsta skipti á Íslandi

Dagana 21.–26. nóvember verður kúbönsk kvikmyndavika í Bíó Paradís. Þetta verður í fyrsta sinn sem kúbanskar kvikmyndir eru sýndar á Íslandi í kvikmyndahúsi, að því er fram kemur í tilkynningu frá Bíó Paradís.

strawberries

Sýndar verða sex nýlegar kvikmyndir, gerðar á árunum 2006 til 2011. „Kúbanir hafa framleitt töluvert af kvikmyndum síðan 1960, sérstaklega á fyrstu árunum eftir byltinguna 1959 og aftur síðustu tvo áratugi, samfara endurmati á ýmsu sem aflaga hafði farið í stjórnmálum og listum. Í raun má tala um einhvers konar kvikmyndavor. Mynd Tomás Gutiérrez Aléas, Jarðarber og súkkulaði (1994) var meðal fyrstu kvikmyndanna sem náði heimsútbreiðslu og var reyndar tilnefnd til Óskarsverðlauna,“ segir í tilkynningunni.

Skipuleggjendur kvikmyndavikunnar eru m.a. þau Erpur Eyvindarson, Eyjólfur Eyvindsson og Sigurlaug Gunnlaugsdóttir.  Kvikmyndavikan er haldin í samstarfi Vináttufélags Íslands og Kúbu og Bíó Paradísar. Kvikmyndastofnunin ICAIC á Kúbu veitti leyfi fyrir sýningu myndanna fyrir milligöngu sendiráðs Kúbu. Allar myndirnar eru með enskum texta.

Kvikmyndirnar sem verða sýndar eru:

Fimmtudag 21.11. kl. 20
Opnunarmynd: Benny Moré
Jorge Luis Sánchez, 2006
El Benny, lengd 120 min.
Leikin mynd sem fjallar um líf og störf Benny Moré, eins þekktasta söngvara Kúbu á sjötta áratug síðustu aldar. Í myndinni eru nýjar útgáfar söngva hans fluttar af m.a. Chucho Valdés, Juan Formael (Los VanVan), Orishas og Haila. Myndin hlaut verðlaun á „New Latin American Cinema“ hátíðinni í Havana í desember 2006.

Fyrir sýningu kl. 19: danssýning, Salsa Iceland
Eftir sýningu kl. 22: Opnunarhátíð

Föstudag 22.11. kl. 20:
Háskaborg
Rebecca Chávez, 2009
Ciudad en Rojo, lengd 90 mínútur (bönnuð innan 14 ára).
Sólarhringur í Santíagóborg í lok sjötta áratugarins. Á yfirborðinu virðist allt ganga sinn vanagang, en banatilræði og hefndir skiptast á. Stuðningur við skæruliða er mikill. Hvaða áhrif hefur það á sjálfa manneskjuna að beita ofbeldi þó málstaðurinn sé góður? Rebecca Chávez tók þátt í andspyrnunni gegn Batista á yngri árum. Hún er kvikmyndagagnrýnandi og heimildarmyndagerðarkona. Myndin byggir á skáldsögunni Bertillión 166, sem hlaut bókmenntaverðlaun Casa de Las Americas árið 1960. Hún var valin til sýningar á kvikmyndahátíðinni í Montreal 2009.

Laugardag 23.11 kl. 20:
Stóri vinningurinn
JC Cremata & Iraida Malberti. 2008
El Premio Flaco, lengd 100 mínútur.
Iluminada hin góðhjartaða býr ásamt óhefluðum eiginmanni sínum í fátækrahverfi í Havana fyrir byltingu. Hún dettur í lukkupottinn þegar hún vinnur i happdætti – eða hvað? Tragíkómísk mynd um það sem gerist þegar allt breytist skyndilega og að hið mikilvægasta í lífinu, þegar á reynir, er að sleppa aldrei hendinni af hinu góða. Myndin hlaut verðlaun á Alþjóðlegu kvikmyndahátíðinni í Havana 2009.

Laugardag 23.11. kl. 22:
Benny Moré
Endursýnd.

Sunnudag 24.11. kl. 20:
Havanastöðin
Ian Padrón, 2011
Habanastation, lengd 95 mínútur.
Veluppalinn strákur býr við allsnægtir í að því er virðist fullkominni fjölskyldu. Pabbinn er tónlistarmaður á alþjóðavísu og mamman upptekin stjórnandi. Í bekknum hans er strákur úr fátæku hverfi sem amman sér um, mamman er dáin og pabbinn í fangelsi. Leiðir þeirra skarast. Þetta er kvikmynd sem snertir viðkvæman streng í kúbönsku samfélagi. Myndin nýtur mikillar hylli á Kúbu og er að hluta sjálfsævisaga leikstjórans, Padrón. Myndin hlaut verðlaun m.a. á Festival de Cine Pobre Humberto Solás 2012 og Traverse International Film Festival í Michigan 2012.

Mánudag 25.11. kl. 20:
Paradísarmiði
Gerardo Chijona, 2010
Boleto al Paraíso, lengd 88 mínútur (bönnuð innan 14 ára).
Snemma á tíunda áratugnum flýr táningsstelpa smábæinn og pabba sinn og kemst með aðstoð nokkurra kúbanskra þungarokkara til Havana. Ekki hefur verið gerð kvikmynd áður um þennan falda, kúbanska menningarafkima. Hún kafar ofan í ókunna hluta Havanaborgar þar sem aðrir ráða ríkjum. Jafnvel þar er rómantíkin – vonlaust ástarsaga sem endar á Los Cocos AIDS-sjúkrahúsinu. Myndin hlaut fjölda verðlauna 2011, á Festival de Biarritz – Cinémas et Culture d’Amerique Latin í París, á Havana kvikmyndahátíðinni í New York, á Festival Ibero-Americano í Brasilíu og Premio Goya á Spáni.

Þriðjudag 26.11 kl. 20:
Gamla húsið
Lester Hamlet, 2010
Casa vieja, lengd 95 mínútur.
Eftir 14 ár á Spáni snýr Esteban aftur til Kúbu þar sem faðir hans liggur fyrir dauðanum. Fjölskylduharmleikur í þremur þáttum; þrír dagar þar sem þrjú systkini hittast: Esteban hinn gáfaði arkitekt, byltingarsinninn og myndhöggvarinn Diego og dóttirin Laura sem býr heima. Þau fylgja föður sínum til grafar og rifja upp gömul sárindi, horfna drauma og leyndarmál. Myndin hlaut verðlaun á Alþjóðlegu kvikmyndahátíðinni í Havana, Nuevo Cine Latinoamericano og Festival de Cine Pobre Humberto Solás 2010 ásamt hátíðinni í Malaga 2011.