Dagana 19.-29. mars verður Alþjóðleg Barnakvikmyndahátíð í Reykjavík haldin í þriðja skiptið í Bíó Paradís. Þar kennir ýmissa grasa og margt skemmtilegt verður í boði. Opnunarmynd hátíðarinnar í fyrra var hin stórskemmtilega Antboy og nú fylgjum við því eftir með framhaldsmyndinni Antboy: Rauða refsinornin sem er opnunarmyndin í ár.
Hátíðin mun í fyrsta skipti vera með erlenda gesti þar sem leikstjóri Antboy-myndanna, Ask Hasselbalch, mun opna hátíðina formlega ásamt Vigdísi Finnbogadóttur, verndara hátíðarinnar og forseta borgarstjórnar, Sóley Tómasdóttur.
Sýndar verða verðlaunamyndir víðs vegar að úr heiminum sem og klassískar íslenskar barnamyndir. Næsta kynslóð kvikmyndagerðarmanna og kvikmyndaunnenda munu hafa tækifæri á að kynnast hvernig kvikmyndir og teiknimyndir verða til, upplifa leiklist fyrir kvikmyndir ásamt því að njóta fjölbreyttra alþjóðlegra barnakvikmynda sem og aldrei fyrr.
Þetta er í þriðja sinn sem hátíðin er haldin og verður hátíðin með opinbert friðarþema í ár. Myndirnar á hátíðinni endurspegla mikilvæg málefni sem tengjast friði og fá börn og unglingar að kynnast hugmyndafræði eins og fjölmenningu, kynvitund, líkamsvirðingu, skapandi og gagnrýna hugsun.
