Dystópíski spennutryllirinn VAKA er á leið í framleiðslu, að því er fram kemur í tilkynningu frá Sagafilm.
Þar segir að serían sé eftir Brynju Björk sem einnig skrifar handrit ásamt Pauline Wolff. Leikstjóri er Henrik Georgsson og Aliette Opheim og Jonas Karlsson leika aðalhlutverk.
Jonas Karlsson og Aliette Opheim.
Þættirnir, sem gerast í Stokkhólmi, fjalla um útbreiðslu banvæns faraldurs sem veldur krónísku svefnleysi. Áhorfendur fylgja ráðherra í fjölmiðlakrísu sem berst við að halda landinu á réttum kili gegnum faraldurinn; sjúkraflutningakonu sem berst fyrir lífi eiginkonu sinnar og unglingsstúlku sem reynir að vernda ungan nágrannastrák frá fjölskyldu hans sem berst við hrikaleg áhrif sjúkdómsins. Þessar þrjár frásagnir fléttast síðan saman á meðan ótti og skelfing heltekur Stokkhólm og fangar íbúa borgarinnar í vakandi martröð.
Samframleiðsluverkefni með Amazon
Eins og segir í tilkynningunni er VAKA samframleiðsluverkefni Amazon MGM Studios, Unlimited Stories, Sagafilm og Skybound Entertainment með stuðningi frá kvikmyndaendurgreiðslukerfi íslenska Menningar-
og viðskiptaráðuneytisins. Skybound Entertainment sér um dreifingarrétt utan Norðurlanda.
Framleiðsla þáttaraðarinnar er áætluð að hefjast í mars 2024 og stefnt er að því að serían verði frumsýnd á Prime Video Nordics í nálægri framtíð og á RÚV hérlendis.
