Seth MacFarlane, maðurinn á bak við Family Guy og American Dad, vinnur nú hörðum höndum að nýrri grínmynd sem mun bera titilinn Ted. Stórleikararnir Mark Wahlberg og Mila Kunis munu fara með aðalhlutverkin í mynd sem fjallar um ungan strák sem á enga vini, en óskar þess í stað að uppáhalds bangsi sinn geti talað. Það heppnast og verða þeir bestu mátar, en 20 árum síðar er bangsinn enn við hlið drengsins og orðinn kvennhatandi, keðjureykjandi, blótandi alkóhólisti.
MacFarlane sjálfur mun ljá bangsanum Ted rödd sína, en hann talar einmitt fyrir ótal margar persónur í þáttum sínum. Meðal annarra leikara sem hafa gengið til liðs við myndina er Joel McHale, sem margir þekkja eflaust úr grínþáttunum Community.
– Bjarki Dagur
