Hinn dáði hasarmyndaleikari Arnold Schwarzenegger leikur nú í hverri myndinni á fætur annarri, en aðdáendur hans geta einmitt barið hann augum í bíó nú um helgina í Escape Plan þar sem hann leikur á móti vini sínum Sylvester Stallone.
Hér fyrir neðan er sýnishorn úr nýrri mynd sem væntanleg er á næsta ári, Sabotage, sem fjallar um baráttuna gegn eiturlyfjasmyglurum, en þar er Schwarzenegger kominn á svipaðar slóðir og í The Last Stand frá því fyrr á þessu ári. David Ayer leikstýrir Sabotage.
Í stiklunni sést Schwarzenegger í hlutverki sínu sem yfirmaður fíkniefnahóps innan lögreglunnar sem tekst á við risastóran eiturlyfjahring sem veltir ótrúlegum fjárhæðum. Hann snýst hinsvegar gegn hópnum þegar hann grunar einn meðlimanna um að standa að baki grimmilegum morðum.
Terrence Howard, Sam Worthington og Mireille Enos leika einnig í myndinni, sem kemur í bíó í Bandaríkjunum 11. apríl 2014.
Kíktu á stikluna hér fyrir neðan:
