Framleiðandinn Steve Bing, einna þekktastur fyrir að vera faðir barns Elizabeth Hurley, gamli refurinn Woody Allen og hinn skemmtilegi Sean Penn, munu vinna saman að kvikmynd. Í þetta sinn ætlar Bing sér að leikstýra og verður það í fyrsta sinn hjá honum, meðan Allen og Penn leika aðalhlutverk myndarinnar. Nefnist hún Why Men Shouldn´t Marry, og fjallar um það hvernig Penn reynir að jafna sig eftir erfiðan skilnað með því að verða and-hjónabandsgúrú. Hann lendir síðan í deilum við Allen, mann sem hefur margoft verið giftur og jafnoft skilinn, en trúir engu að síður áfram í einlægni á hjónabandið. Tökur á myndinni hefjast í ágúst á næsta ári og verður myndin tekin upp í Los Angeles.
