Kvikmyndaaðlögun tölvuleiksins Death Stranding mun mögulega verða tekin upp að hluta á Íslandi.
Leikstjórinn Michael Sarnoski, sem gerði kvikmyndirnar Pig og A Quiet Place: Day One, vinnur að myndinni fyrir framleiðslufyrirtækið A24. Í viðtali við Variety segist hann nýlega hafa skilað annarri útgáfu handritsins og vonast til að taka myndina upp á Íslandi og á Norður-Írlandi á næsta ári.
Death Stranding gerist í eyðilegu, brotnu landslagi í Bandaríkjunum eftir náttúruhamfarir, og íslenskt landslag hefur lengi verið eftirsótt þegar kvikmyndagerðarmenn vilja sýna heim sem er bæði jarðneskur og annarlegur. Um heiminn í myndinni ráfa yfirnáttúrulegar verur.
Sarnoski segir myndina gerast í heimi leiksins, en leikstjórinn muni skapa ákveðnar persónur sjálfur, þó að þeir sem þekki leikinn muni kannst við persónur úr honum. Sarnoski vill að hún verði stór í umfangi en samt sérkennileg og persónudrifin.
Heimild: Variety
