Heimildamyndin Póstkort eftir Freyju Kristinsdóttur hlaut á dögunum dómnefndarverðlaun í Edmonton í Kanada eins og klapptré greinir frá.
Þar segir að hátíðin sé ein þeirra alþjóðlegu kvikmyndahátíða þar sem verðlaun í tilteknum flokkum veita þátttökurétt til Óskarsverðlaunanna.
„Freyja Kristinsdóttir delivered an emotional punch with this heartwarming story of a 46-day journey through the Camino, where 46 treasured postcards become a touching symbol of everlasting love. Equally heartbreaking as it is hopeful, this beautifully recreated story touched our hearts,“ sagði dómnefnd kvikmyndahátíðarinnar í Edmonton eða í lauslegri íslenskri snörun:
„Freyja Kristinsdóttir hreyfði rækilega við áhorfendum með þessari hjartnæmu sögu af 46 daga ferðalagi eftir Jakobsveginum, þar sem 46 dýrmæt póstkort verða að tákni um eilífa ást. Þessi fallega saga, sem er jafn átakanleg og hún er upplífgandi, snerti hjörtu okkar.“
Heimsfrumsýnd á RIFF
Heimildamyndin, sem framleidd er af Heather Millard með stuðningi frá Kvikmyndamiðstöð Íslands, var heimsfrumsýnd á RIFF haustið 2025 og hefur síðan verið sýnd á kvikmyndahátíðum víða um heim. Myndin hlaut fyrr á þessu ári tvenn Edduverðlaun, fyrir heimildastuttmynd ársins og uppgötvun ársins.
Klapptré segir frá því að teymið á bak við Póstkort undirbúi nú kynningarherferð myndarinnar fyrir Óskarsverðlaunin, en tilkynnt verður í byrjun desember hvaða 15 stuttu heimildamyndir komast á stuttlistann svokallaða. „Íslenskar heimildamyndir eiga því tvö tækifæri í Óskarsverðlaunakapphlaupinu í ár. Jörðin undir fótum okkar eftir Yrsu Roca Fannberg hefur verið valin framlag Íslands í flokki alþjóðlegra kvikmynda, en Póstkort hefur öðlast þátttökurétt í flokki stuttra heimildamynda með sigrinum í Edmonton,“ segir í frétt Klapptrés.
