Við fjölluðum um Fjalaköttinn þegar honum var hleypt af stokkunum í ár og viljum minna á það aftur í dag, því hátíðin er í fullum gangi!
Alþjóðleg kvikmyndahátíð í Reykjavík endurreisti á síðasta ári
kvikmyndaklúbbinn Fjalaköttinn ásamt fagfélögum kvikmyndagerðarmanna og
leikara. Fjalakötturinn ætlar að bjóða upp á vikulegar sýningar á
sunnudögum og mánudögum, í Tjarnabíói. Heimildamyndin Joy Division
verður fyrsta mynd kvikmyndaklúbbsins sem hefst þann 17 febrúar 2008 og lýkur þann 24. mars með sérstakri François Truffaut helgi, tileinkaðri franska leikstjóranum.
Með
sýningum á nýjum og spennandi myndum í bland vid eldri djásn verður
dagskráin eins fjölbreytt og ríkuleg og á síðasta ári. Allt í allt
verða yfir 15 kvikmyndir í fjórum meginflokkum sýndar á tímabilinu, auk
sératburða. Fjalakötturinn einsetur sér að kynna fyrsta flokks
kvikmyndir sem rata ekki endilega inn í hin hefðbundnu kvikmyndahús
höfuðborgarsvæðisins.
Dagskránni er skipt í fjóra meginflokka:
· Erlend djásn (3 myndir)
· Nýjar þýskar kvikmyndir (3 myndir)
· Norðurlönd (6 myndir)
· Truffaut-helgi (5 myndir)
Erlend djásn (3 myndir):
Joy Division (2007)
er sjálfstætt framhald myndarinnar Control sem sýnd var á
Alþjóðlegu kvikmyndahátíðinni í fyrra og fjallar um breska
rokkbandið Joy Division. 28 árum eftir að Ian Curtis,
aðalsöngvari sveitarinnar, svipti sig lífi, er Joy Division enn
meðal þekktustu rokksveita heims. Í myndinni er saga sveitarinnar
rakin með með viðtölum við eftirlifandi meðlimi og
aðstandendur. Áhorfandinn er leiddur um úthverfi Manchesterborgar og
samtíma þessarar merku rokksveitar. Leikstjóri er Grant Gee sem
einnig leikstýrði verðlaunamyndum um hljómsveitirnar Radiohead og
Gorillaz.
Hrossaþjófarnir / Voleurs de Cheveaux / The Horse Thieves (2007)
eftir Micha Wald er stílhreinn og glæsilegur 19. aldar-‚austri‘
þar sem sögusviðið er Austur-Evrópa á tímum kósakkahersins.
Bræðurnir Jakub og Vladimir eru fátækir götustrákar sem skrá
sig í her kósakkana og eiga þar ekki sjö dagana sæla. Bræðurnir
Roman og Elias eru fátækir götustrákar sem lifa á því að ræna
hrossum og húsdýrum. Þegar hinum síðarnefndu verður á að ræna
hrossum hinna fyrrnefndu hefst atburðarrás hefndarskyldu og ofbeldis
sem erfitt reynist að stöðva. Þetta harðneskjulega búningadrama
er stórkostlega vel framreidd hugleiðing um bræðralag,
fyrirgefningu, ást og hatur. Þess má geta að tónlist Jóhanns
Jóhannssonar við leikritið Englabörn svífur yfir vötnum í
myndinni.
Melónuleiðin / Put Lubenica / The Melon Route (2006)
eftir Branko Schmidt er raunsæ og óhugnanleg mynd frá Króatíu.
Myndin byggist á raunverulegum atburðum þegar hópur innflytjenda
drukknaði í leyndum flutningum yfir fljótið Sava á landamærum
Bosníu og Króatíu. Leikstjórinn spinnur verkið út frá
atburðinum og dregur söguna fram um augu ungrar kínverskrar stúlku
sem lifir af. Mirko er uppgjafahermaður sem ferjar innflytjendurna
yfir fljótið. Eftir slysið tekur hann stúlkuna undir verndarvæng
sinn og leynir henni fyrir umheiminum. Með þeim hefst ástarsamband
og það leiðir til óumflýjanlegs uppgjörs við glæpahyskið sem
ræður ríkjum á svæðinu.
Nýjar þýskar kvikmyndir (3 myndir)
Sálumessa / Requiem (2006)
eftir Hans-Christian Schmid byggist á raunverulegum atburðum þegar
ung katólsk kona lét lífið í Þýskalandi 1976 eftir að reynt
var að særa úr henni illa anda. Hollywood hefur þegar sent frá
sér útgáfu af þessum atburðum með hryllingsmyndinni The Exorcism
of Emily Rose (2005) en hér er nálgunin af allt öðrum toga.
Requiem hefur víða verið tilnefnd til verðlauna og hlaut meðal
annars FIPRESCI verðlaunin í Berlín 2006.
Riddarar hvíta tjaldsins / Leinwandfieber / Comrades in Dreams (2006)
er heimildamynd um fjóra kvikmyndagerðarmenn sem hafa misjafnar
skoðanir á pólitík og koma frá ólíkum menningarheimum. Öll
eiga þau þó eitt sameiginlegt: Óstöðvandi ást á kvikmyndum.
Þrátt fyrir ólíkan bakgrunn fást þau við sömu úrlausnarefni
í kvikmyndagerðinni. Kvikmyndarformið lifir án landamæra og
snertir fólk í öllum hornum heimsins. Leikstjóri er Uli Gaulke.
Yella (2007)
eftir Christian Petzold er viðskiptatryllir af bestu gerð og hefur
hlotið mikið lof gagnrýnenda. Kvenhetjan Yella flýr óspennandi
líf og brjálaðan eiginmann þegar hún flytur til Hannover og fær
vinnu sem bókhaldari hjá vafasömu fyrirtæki. Hún dregst inn í
svarthvítan og skuggalegan heim vel klæddra hákarla og áður en
langt um líður knýr fortíðin dyra hjá Yellu. Aðalleikkonan Nina
Hoss hlaut Silfurbjörninn í Berlín fyrir frammistöðu sína og
Petzold þykir hafa tekist með eindæmum vel að skapa myrka en
jafnframt kunnuglega veröld í mynd sem dansar á mörkum hryllings,
drama og spennu.
Norðurlönd (6 myndir):
Sem á himni / Så som i himmelen / As it is in Heaven (2004)
Heimsfrægur hljómsveitarstjóri ákveður að hætta störfum og
snúa aftur til bernskuheimilis síns, smáþorps í Norður-
Svíþjóð. Hann hefur ekki dvalist þar lengi þegar hann er beðinn
að hlusta á þorpskórinn sem æfir á hverjum fimmtudegi. Hann á
erfitt með að segja nei og ákveður að hlýða á kórinn, sem
verður aldrei samur.
Mannaland – myndin mín um Grænland / Menneskenes Land – min film
om Grønland / The Land of Human Beings – my Film about Greenland
(2006)
er ljóðræn heimildamynd eftir Anne Regitze Wivel þar sem lýst er
nútímasamfélagi Grænlendinga og skoðuð áhrifin sem
nýlendustefnan hefur haft á land og þjóð. Með sjálfstæðum og
áhrifamiklum sögum fær áhorfandinn innsýn í líf Grænlendinga,
kynnist fortíð þeirra og vonum um framtíðina. Myndin hlaut The
Danish Robert Award verðlaunin 2007 sem besta heimildamynd ársins.
Ár úlfsins / Suden vuosi / The Year of the Wolf (2007)
er mynd úr smiðju Ollis Sarelas, eins verðlaunaðasta
samtímaleikstjóra Finna. Í myndinni segir frá sambandi Mikkos,
miðaldra kennara, og Sariar, sem er gáfuð, bráðfalleg
háskólastúlka en þjáist af svefnsýki. Sari berst við
sjúkdóminn og einangrar sig frá umheiminum en Mikko á fullt í
fangi að berjast við flóknar tilfinningar sínar. Bæði eiga þau
erfitt með að njóta þess sem lífið hefur að bjóða en þrátt
fyrir hlédrægni sína ná þau að kynnast og með þeim hefst
dramatískt ástarsamband þar sem boð og bönn eru látin lönd og
leið.
Ketill (2008)
eftir Joseph Marzolla og Tómas Lemarquis. Í þessari heimildamynd
kynnumst við áhugaverðum heimi hins 71 árs Ketils Larsens. Ketill
verður frumsýnd í Fjalakettinum 2008.
Snifffarinn / Sniffer (2006)
er norsk stuttmynd með heimspekilegu ívafi eftir Bobbie Peers.
Myndin segir frá samfélagi þar sem allir geta flogið en enginn
þorir að takast á loft. Sniffer vann Gullpálmann í Cannes 2006
sem besta stuttmyndin.
Spandexmaðurinn / Spandexmann / Spandex Man (2007)
er norsk stuttmynd eftir Bobbie Peers. Myndin segir frá 35 ára
blaðbera sem kafar í fortíð sína á vægast sagt óvenjulegri
skólaskemmtun þar sem gamlir félagar hittast á ný.
Stutt kvikmynd án titils / Untitled Short Film (2006)
Ungur sjómaður ráfar um götur ótilgreindrar stórborgar í
beljandi rigningu. Farsími hans hringir og hann ákveður að leita
sér skjóls í nútímalistasafni. Ákvörðun hans verður jafnframt
upphafið af stórum miskilningi.
Truffaut-helgi (5 myndir):
Húðmýkt / La peau douce / The Soft Skin (1964)Pierre Lachenay er
giftur maður um fertugt. Hann býr í auðmannahverfi í París
ásamt konu sinni og dóttur. Á ferðalagi hans til Lissabon, þar
sem hann á að flytja fyrirlestur um rithöfundinn Balzac, hittir
hann unga flugfreyju, Nicole. Með þeim hefst ástarsamband. Pierre
skilur við konu sína, biður Nicole að giftast sér og líf hans í
París gjörbreytist.
Ensku konurnar og meginlandið / Les deux anglaises et le continent /
The two English Girls and the Continent (1971)París á fyrstu árum
tuttugustu aldar. Claude Roc kynnist Önnu Brown, ungri enskri konu
sem er í heimsókn í borginni. Hún býður honum yfir til Englands
til að hitta systur sína, Muriel, og vill leiða þau saman. Claude
biður Murielar, sem hafnar bónorðinu en skilur hann eftir í
þeirri von að með þeim geti tekist ástir. Mæður þeirra Claude
og Murielar ákveða að skilja þau að í eitt ár og Claude heldur
aftur til borgar ástarinnar. Þar gerist hann listgagnrýnandi,
kynnist öðrum konum og verður elskhugi Önnu.
Jules og Jim / Jules et Jim / Jules and Jim (1962)
Myndin gerist á árum fyrri heimsstyrjaldarinnar og fjallar um
ástarþríhyrning og vináttubönd. Jules, feiminn rithöfundur frá
Austurríki, og Jim hinn frjálslegi og lífsglaði verða vinir.
Þeir eiga lífsþorstann sameiginlegan og kunna báðir að meta
lífsstíl bóhemlistamannsins. Þeir verða báðir ástfangnir af
hinni glaðlyndu Catherine. Þótt ástin sé komin í spilið
slettist ekki upp á langvarandi vináttu þeirra. Handrit myndarinnar
er byggt á skáldsögu eftir Henri-Pierre Roché sem er lauslega
byggð á ævi rithöfundarins. Truffaut lýsti bókinni sem „óði
til ástarinnar og lífsins sjálfs“.
Konan í næsta húsi / La femme d’à côté / The Woman Next Door
(1981)
Bernard er hamingjusamur heimilisfaðir sem býr með konu sinni
Arlette og syninum Tómasi. Dag einn flytja Philippe og Mathilde
Bauchard í næsta hús. Í óvæntri atburðarrás hittast þau
Mathilde og Bernard á ný eftir leynilegt ástarsamband fyrir
mörgum árum.
Síðasti metróinn / Le Dernier Metro / The Last Metro (1980)
París, september 1942. Lucas Steiner, leikhússtjóri Montmarte-
leikhússins, hefur þurft að flýja borgina vegna þess að hann er
gyðingur. Í hans stað telur eiginkona hans, Marion, við stjórn
leikhússins. Hún ræður til sín leikarann Bernard Granger úr
öðrum leikhóp í borginni til að leika á móti sér
aðalhlutverk í verki sem á að setja upp í Montmartre-
leikhúsinu. Þau þurfa að þola aðkast og hótanir frá stærri
leikhúsum borgarinnar sem eru undir stjórn nasista. Óljóst er
hvort þau ná að frumsýna verkið, sem Lucas leikstýrir í leynd.
Meiri upplýsingar má sjá á heimasíðu Fjalakattarins, www.filmfest.is